Украинада президент сайлауы онлайн өтуі мүмкін

Украина президенті Владимир Зеленский елде сайлауды онлайн форматта өткізу мүмкіндігін қарастыруға болатынын мәлімдеді. Ол үшін парламент тиісті шешім қабылдауы керек. Бұл туралы украин халқының көшбасшысы Германияның ZDF телеарнасына берген сұхбатында айтты, деп жазады Kursiv Media.

Зеленскийдің айтуынша, сайлау ұйымдастырудағы басты қиындықтардың бірі – майдан шебіндегі әскери қызметшілердің дауыс беруіне жағдай жасау. Миллиондаған адам окопта жүргендіктен, олардың сайлауға қатысуын дәстүрлі жолмен ұйымдастыру техникалық тұрғыдан қиын.

«Бұл әділетті ме? Қарулы күштер майданда жүр, олар да сайлауға қарсы, өйткені дауыс беру мүмкіндігі жоқ. Миллиондаған адам окопта отыр, ал олардың дауыс беруін техникалық тұрғыдан ұйымдастыру мүмкін емес», – деді Украина президенті.

Осы мәселенің ықтимал шешімі ретінде Зеленский онлайн дауыс беруді атады. Алайда мұндай форматты енгізу үшін парламент тиісті тетіктерді қарастыруы қажет.

Айта кетейік, бұған дейін АҚШ президенті Дональд Трамп Зеленскийді сынап, Украинаға келісімдер жасай алатын жаңа басшы сайлау қажет екенін мәлімдеген.

Оқи отырыңыз: «Не істеп жүргенін білмейді»: Трамп тағы да Зеленскийге шүйлікті