«Қызылжар» футбол клубының бұрынғы президентіне іздеу жарияланды

Петропавлдың «Қызылжар» футбол клубының бұрынғы президенті Григорий Лорияға іздеу жариялады. Мұндай ақпарат Қазақстан Бас прокуратурасының Құқықтық статистика органдарының порталында пайда болды, деп хабарлайды Kursiv.Media.

Іздеуді Қаржылық мониторинг агенттігі салды, ал іздестірумен Солтүстік Қазақстан облысы бойынша Экономикалық тергеу департаменті айналысып жатыр.

Бұрынғы басшығы сеніп тапсырылған мүлікті иемденіп алу, талан-таражға салу және салық төлеуден жалтару бойынша айып тағылып отыр.

Qazaqstan Media хабарлағандай, 5 қарашада Григорий Лория СҚО бойынша Экономикалық тергеу департаментіне «Сеніп тапсырылған бөтен мүлікті иемденіп алу немесе талан-таражға салу» бойынша шақырылған.

Департаментке келмегендіктен, 7 қарашада Лорияға қатысты іздестіру ісі тіркелгені белгілі болды.

Григорий Лория «Қызылжар» футбол клубын 2014 жылдан 2024 жылдың наурызына дейін басқарды. Оның ұлы, ұлттық құраманың бұрынғы қақпашысы Давид Лория маусым айында елордалық «Жеңіс» клубының бас директоры болып тағайындалды.

2024 жылы «Қызылжар» футбол клубында бюджет қаражатын жымқыру дерегі анықталды. Клубтың бухгалтері Ольга Замелацкая қылмыстық жауапкершілікке тартылды. 2026 жылдың қаңтарында сот оны жеті жыл алты айға бас бостандығынан айыруға үкім етті.