Шетелдіктер Қазақстанға келмей-ақ онлайн форматта ЖСН ала алады

Қазақстан Ішкі істер министрлігі шетел азаматтарына жеке сәйкестендіру нөмірін (ЖСН) онлайн рәсімдеу бойынша пилоттық жобаны іске қосты. Енді шетелдіктер өтінішті мобильді қосымша арқылы беріп, нәтижесін де онлайн ала алады.

Мемлекеттік қызмет QazETA мобильді қосымшасы арқылы көрсетіледі. Өтініш беру және оның нәтижесін алу MAQ цифрлық миграциялық қызметтер платформасында жүзеге асырылады.

Қызмет көрсету мерзімі – бір жұмыс күні.

ЖСН алу үшін шетел азаматы алдымен мобильді қосымшаға тіркелуі немесе жүйеге кіруі керек. Одан кейін жеке деректерін жинауға және өңдеуге келісім беріп, ұялы телефон камерасы арқылы жеке басын куәландыратын құжатты суретке түсіріп, биометриялық сәйкестендіруден өтуі қажет.

Бұдан соң Қазақстанға кірген шетелдіктер «Бүркіт» бірыңғай ақпараттық жүйесі арқылы тексеріледі. Тексеру нәтижесі оң болса, өтініш рәсімделеді.

Ішкі істер министрлігі өтініштің дұрыс толтырылғанын, құжаттағы деректердің сәйкестігін және өтініш берушіге бұрын ЖСН берілген-берілмегенін тексереді. Барлық талап сақталса, шетел азаматына ЖСН беріледі.

Дайын нәтижені MAQ платформасындағы «ЖСН өтінімдерінің тізімін көру» немесе «ЖСН-ді көру» бөлімдерінен тексеруге болады. Сондай-ақ тіркеу туралы куәлікті жүктеп алуға мүмкіндік бар.

Әзірге жоба пилоттық режимде жұмыс істейді.

Оқи отырыңыз: Енді шетелдіктер Қазақстанға кіру үшін электронды рұқсат алуы керек