Бағасы 11,79 млн теңге: Changan UNI-S 4WD кроссоверінің сатылымы басталды

Қазақстанда жаңа Changan UNI-S 4WD кроссоверінің сатылымы басталды. Толық жетекті модель Алматыдағы Astana Motors Manufacturing Kazakhstan зауытында құрастырылады. Көлік −40 °C аязда оталуға бейімделген, АИ-92 бензинін пайдаланады және бір ғана жинақтамада ұсынылады. Бағасы – 11 790 000 теңге.

Қозғалтқышы мен толық жетекті жүйесі

Жаңа Changan UNI-S 4WD 1,5 литрлік турбоқозғалтқышпен жабдықталған. Оның қуаты – 181 ат күші, айналу моменті – 280 Н·м. Қозғалтқыш 7 сатылы робот беріліс қорабымен жұптастырылған. Кроссовер 100 км/сағ жылдамдыққа 9,5 секундта жетеді.

Қала ішінде және күрделі жол жағдайында жүруге арналған модельде Eco, Normal және Sport режимдерінен бөлек, қар, балшық пен құмға арналған Snow, Mud және Sand режимдері бар. Сондай-ақ төмен түсуге және өрге көтерілуге көмектесетін жүйелер қарастырылған.

Қазақстан жағдайына бейімделген

Қазақстанға арналған нұсқаның басты ерекшеліктерінің бірі – 68 литрлік жанармай багы мен қозғалтқышты −40 °C температурада іске қосу мүмкіндігі. Кроссовер АИ-92 бензинімен жүреді. Мәлімделген орташа жанармай шығыны 100 шақырымға 8,3 литр, ал толық бакпен жүріс қоры шамамен 820 шақырымды құрайды.

Қыс мезгілінде жайлылықты қамтамасыз ету үшін алдыңғы және артқы орындықтар, руль, әйнектер, айналар мен әйнекжуғыш форсункалары жылытылады. Қозғалтқышты қашықтан іске қосу функциясы да бар.

Салоны мен жабдықтары

Кроссовер салонында 14,6 дюймдік мультимедиа дисплейі және 10,25 дюймдік цифрлық аспаптар панелі орнатылған. Apple CarPlay және Android Auto жүйелеріне сымсыз қосылуға болады. Мәзір қазақ, орыс, ағылшын және өзбек тілдерінде қолжетімді.

Жабдықтар қатарында екі аймақты климат-бақылау, сымсыз қуаттау құрылғысы, алдыңғы орындықтарды желдету және электр жетекті жүксалғыш бар. Оның көлемі – 475 литр.

Қауіпсіздік жүйелері

UNI-S 4WD адаптивті круиз-бақылау, жаяу жүргіншілерді анықтайтын автоматты шұғыл тежеу, соқыр аймақтарды бақылау және қозғалыс жолағында ұстап тұру жүйелерімен жабдықталған.

Сондай-ақ 360 градусқа шолу камералары, қашықтан тұраққа қою функциясы және алты қауіпсіздік жастығы қарастырылған.

Бағасы мен кепілдігі

Changan UNI-S 4WD Қазақстанда бір ғана жинақтамада сатылады. Бағасы – 11 790 000 теңге. Өндіруші автокөлікке 5 жыл немесе 150 мың шақырымға дейін кепілдік береді.

Компания мәліметінше, 2026 жылдың алғашқы тоғыз айында Қазақстанда Changan көліктерінің сатылымы 15,6 мың данадан асқан. Бренд сатылым рейтингінде сегізінші орыннан төртінші орынға көтеріліп, нарықтағы үлесін 5%-дан 9%-ға дейін арттырған.

Тағы да оқыңыз: Қазақстанда Changan Eado Plus-тің жаңа нұсқасы пайда болады