Жәнібек Әлімханұлының допингтен кейінгі алғашқы жекпе-жегі белгіленді

Қазақстандық кәсіпқой боксшы Жәнібек Әлімханұлының келесі жекпе-жегі 2027 жылғы 23 қаңтарға жоспарланған. Ол Данияның Хорсенс қаласында жергілікті боксшы Якоб Банкпен кездеседі, деп хабарлайды Kursiv Media.

Бұл туралы Жәнібек өзінің instagram парақшасында мәлімдеді. Жарияланған мәліметке сәйкес, кездесу екінші орта салмақта (76,2 келі) өтеді. Жекпе-жекте WBO нұсқасы бойынша әлем чемпионы атағы сарапқа салынатыны айтылған.

Қазақстандық боксшы бұған дейін орта салмақта өнер көрсетіп, әлем чемпионы атанған. Енді ол жаңа салмақ дәрежесінде чемпиондық белбеу үшін жұдырықтасуды көздеп отыр.

Ал оның қарсыласы Якоб Банк Данияның Хорсенс қаласында өнер көрсетеді. Әлімханұлы кәсіпқой рингте 17 жекпе-жек өткізіп, барлығында жеңіске жеткен.

Еске салайық, 2025 жылдың желтоқсанында Жәнібек Әлімханұлының допинг сынамасынан тыйым салынған мельдоний препараты анықталған. Кейін В сынамасы да бұл нәтижені растады. Осыған байланысты оның WBA чемпионы Эрисланди Ларамен өтуі тиіс біріктіру жекпе-жегі өтпей қалды.

2026 жылдың ақпанында WBO қазақстандық боксшыны бір жылға жарыстардан шеттеткенімен, чемпиондық белбеуін сақтап қалды. Ал наурызда IBF ұйымы оны орта салмақтағы әлем чемпионы атағынан айырды.

Кейін WBO Әлімханұлының шеттетілу мерзімін ертерек тоқтату туралы шешім қабылдады. Боксшының өзі тыйым салынған препараттарды қасақана қолданбағанын айтып, таза спортты қолдайтынын мәлімдеген. Енді Жәнібек Әлімханұлы допинг дауынан кейін жаңа салмақ дәрежесінде чемпиондық атаққа таласуды көздеп отыр.