Иранда Boeing ұшағының апатына күдіктілер тұтқындалды

Иранда украиналық Boeing ұшағының апатына алғашқы күдіктілер тұтқынға алынды, деп хабарлайды Иран сот билігінің өкілі Голамхосейн Эсмаилиге сілтеме жасаған Reuters.

Тұтқынға алынған Иран әскерилерінің саны айтылмайды. Сонымен қатар, істің мән-жайы туралы басқа да мәліметтер келтірілмеген. 

Бұған біздің қосарымыз, бұдан бұрын Ирандағы Ислам революциясы жасақшылары корпусының (ИРЖК) қолбасшысы Хосейн Салами атып құлатылған ұшақ үшін кешірім сұраған-ды.

Иран президенті  Хасан Рухани кінәлілерді жазалауды уәде еткен-ді.

«Украина халықаралық әуе жолдары» компаниясының Boeing 737 ұшағы 8-қаңтарда Тегеран әуежайынан ұшқаннан кейін, бірнеше минут өткенде апатқа ұшыраған болатын. Соның салдарынан, 176 адам – Ауғаныстан, Германия, Иран, Канада, Украина, Великобритания және Швеция азаматтары – қаза болды.