Елімізде коронавирус жұқтырғандар саны 8-ге жетті

«Бүгінгі таңда қосымша тағы екі адам тіркелді. Бірінші науқас – әйел адам. Біздің инфекциялық стационарда оқшаулауда жатқан пациент. Бұрын күйеуінде диагноз анықталып, жақын байланыстағы адам ретінде оқшаулауда жатқан. Қосымша диагностиканың нәтижесінде коронавирус инфекциясы табылды. Оның отбасындағы жақындарының бәрі оқшауланды. Бәрі сол инфекциялық ауруханада», – деді Денсаулық сақтау министрі Елжан Біртанов. Ақпарат Денсаулық сақтау министрлігінің Facebook парақшасында көрсетілген тікелей эфирінен алынды.

Министр екінші пациент ер адам екенін айтты. Ер адам 1995 жылы туылған.

«Ол кеше Сеул-Алматы арқылы ұшақпен ұшып келген. Ұшақтан келген 130 жолаушының ішінде трансфермен кеткені бар. Бәрі де 100 пайыз инфекциялық ауруханаға және оқшауланған стационарға жатқызылды. Қалаға ешкім кірген жоқ. Сол науқастардың арасында карантинді біз диагностикалық нәтижесінде бір пациентті анықтадық», – деді ол.

Сонымен, елімізде жалпы коронавирус жұқтырғандар саны 8-ге жетті. Барлығы оқшауланған.

 Сонымен қатар, 1425 адам стационарда оқшауланса, ал 496 үй жағдайындағы карантинде жатыр.