Екібастұз қаласының тұрғыны Виктория Волошина бала кезден нашар естиді. Бұл оның сөйлеуіне де кері әсерін тигізбей қоймады. Бірақ Виктория жасыған жоқ. Арнайы кәсіптік мектепте тігінші мамандығы бойынша білім алып, тігін шеберханасында жұмыс істеп те үлгерді. Осыдан екі жыл бұрын құлағына ота жасатып, арнайы аппарат орнатты. Содан соң бұрынғыдан жақсы еститін болып, мол мүмкіндік ашылды.
Алғашқысы – сызғыш
2017 жылы Виктория жолдасы Максиммен бірге тың кәсіп – векторлық графиканы үйрене бастады. Бірақ, сүйікті істі табысты кәсіпке айналдыру үшін қаржы жоғы қолбайлау болды. Жарының векторлық графикаға қызығушылығы зор екенін байқаған Максим нар тәуекел етіп, екінші деңгейлі банктердің бірінен несие алды. Сөйтіп, 900 мың теңгеге негізгі құралды, 500 мың теңгеге оған қажет қосымша жабдықтарды сатып алды. Кейін Өңірлік кәсіпкерлер палатасында «Бастау-Бизнес» жобасы аясында кәсіпкерлік негіздерін үйреніп, 252 мың теңге қайтарымсыз қаржыға ие болды. Осылайша, отбасылық бизнес басталды.
«Ағаштан ойып жасаған алғашқы затымыз – оқушылар қолданатын кәдімгі сызғыш. «Мұндай кеңсе тауарының түрі-түрі дүкенде самсап тұр» дерсіз. Біздің өнімнің ерекшелігі сол, арнайы тапсырыспен, балалардың есімін ойып тұрып жасаймыз. Әрі бағасы қолжетімді. Сондықтан сұраныс та жоғары», – дейді Виктория Волошина.
Ал бүгінде «3D BEREZA» жеке кәсіпкерлігі ағаштан, пластиктен жасалған жүзден астам өнім шығарады. Олардың қатарында қарапайым сувенир, есімхаттан бастап сағат, сандыққа дейін бар. Тұрғындар әлеуметтік желі арқылы тапсырыс береді, ал кәсіп иелері тұтынушының қалауына қарай сапалы өнім ұсынады.
Тегін цех
Виктория, Максим Волошиндер кәсіп ауқымын кеңейтіп, бизнестің ілгерілей түсуіне мемлекеттік қолдау оң әсер етті деп пайымдайды. Себебі бұған дейін гаражды жалға алып келген олар енді «Өркен» шағын индустриялық аймағында үш бірдей кеңсені тегін пайдаланып отыр.
«Кәсіпті жаңадан бастап, тек сызғыш жасаған тұста қиналғанымыз жасырын емес. Біз жалға алған гаражда басқаны былай қойғанда, қол жуатын мүмкіндік болған жоқ. Өзге коммерциялық нысандарды жалдау қымбат болғандықтан, сол гаражда, үйде тапсырысты жасауға тура келді. Ал таяуда шағын индустриялық аймақтан тегін цех берілді. Бұл – бизнеске жасалған жақсы қолдау», – дейді Максим Волошин.
Жас отбасы алдағы уақытта тек ағаш пен пластиктен емес, өзге шикізаттан да заттар жасап, тұтынушыларға ұсынуды жоспарлаған еді. Бірақ еліміздегі соңғы жағдайларға байланысты бұған дейін қабылдаған тапсырыстарды орындап, жұмыс ауқымын шектеуге мәжбүр.
