Қазақстан президенті Қасым-Жомарт Тоқаев Түркістан облысындағы су тасқынынан зардап шеккендерге көмек көрсетуді тапсырды деп хабарлайды Kursiv.kz.
«Өзбекстандағы су қоймасы бөгетінің бұзылу салдарынан Түркістан облысының Жеңіс және Жаңа тұрмыс ауылдарын су басты. Бүгін Премьер-министр Асқар Мамин мен облыс әкімі Өмірзақ Шөкеев ауыл тұрғындарын эвакуациялау бойынша қабылданған шаралар туралы баяндады. Зардап шеккен отбасыларға көмек көрсетуді тапсырдым», – деп жазады Тоқаев Twitter парақшасында.
Айта кетейік, 1 мамырда Сардоба су қоймасы бөгетінің бұзылына байланысты Өзбекстанның Сырдария облысындағы елдімекенді су басты. Салдарынан Мақтаарал ауданында шекара маңындағы бірнеше коллектор суға толып қалған. Мақтааралдағы орталық коллектордан су төгіліп, Жеңіс, Жаңа тұрмыс ауылдарын су алып кетті.
Су қоймасы маңында тұратын 70 мыңға жуық адам қауіпсіз аймақтарға эвакуацияланды.
Түркістан облысының Мақтаарал ауданында төтенше жағдай жарияланды.
