Режиссер Ақан Сатаев «Қазақфильм» АҚ президенті болып тағайындалды

Қазақстандық режиссер Ақан Сатаев Қазақстан Республикасының Мәдениет және спорт министрі Ақтота Раимқұлованың бұйрығымен Шәкен Айманов атындағы «Қазақфильм» АҚ президенті болып тағайындалды. Бұл туралы департаменттің ресми сайтында хабарлады.

2019 жылдың 12 тамызынан бастап бұл лауазымды актер және продюсер Арман Асенов атқарды.
Жаңа көшбасшыны командаға Мәдениет және спорт вице-министрі Нұрғис Дәуешов таныстырды.
Ақан Сатаев – «Сатайфильм» студиясының негізін қалаушы. «Рэкетир», «Ликвидатор», «Жоғалған», «Ағайындылар», «Томирис», «Бауыржан Момышұлы» фильмдерінде жұмыс жасаған. Оның ең танымал фильмдерінің бірі – Жаужүрек Мың Бала деп саналады. 2014 жылы «Халық қалаулысы» ұлттық сыйлығына ие болды.

2013 жылы президенттің жарлығымен Қазақстанның еңбек сіңірген қайраткері құрметті атағына ие болды. 2019 жылдың қарашасында президенттің жарлығымен «Құрмет» орденімен марапатталды.

2016 жылы ол жас режиссерлерді қолдауға бағытталған Астананың кино қорын құрды.