Елімізде карантин шектеулері жеңілдетілген сәттен бастап, қазақстандықтарға жалпы сомасы 1,3 млрд теңге болатын 15 мыңнан астам айыппұл салынған. Бұл туралы ҚР Денсаулық сақтау вице-министрі, Бас мемлекеттік санитарлық дәрігер Ерлан Қиясов ОКҚ-да өткен баспасөз конференциясында хабарлады.
17 тамыз бен 7 желтоқсан аралығында 53489 рейд жүргізілсе, 215970 нысан тексеріліп, соның ішінде 18903 нысанның санитарлық-эпидемиологиялық нормаларды бұзғаны анықталған. Карантин талаптарын сақтамағандар Түркістан (3279 нысан), Алматы (3121 Нысан), Қостанай (1758 нысан), Шығыс Қазақстан (1598 нысан) облыстарында, сондай-ақ Алматы (1584 нысан) және Нұр-Сұлтан (1341 нысан) қалаларында көптеп анықталған.
Жалпы, Қиясовтың айтуынша, маска тақпағаны, әлеуметтік қашықтықты сақтамағаны, эпидемияға қарсы іс-шаралар мен жұмыс режимін бұзғаны және бұқаралық іс-шара өткізгені үшін қазақстандықтарға жалпы сомасы 1,3 млрд теңге көлемінде 15268 айыппұл салыныпты. Оның ішінде 91-і – лауазымды тұлғаларға, 344-і – заңды тұлғаларға, 1458-і – жеке кәсіпкерлерге, 13375-і жеке тұлғаларға салынған. Соның ішінде 7137 айыппұлды жұмыс орнында сантарлық талаптарды сақтамағаны үшін арқалаған.
Айта кетейік, бұған дейін Мәжіліс депутаттары пандемиямен күрес кезеңінде заңды тұлғаларға санитарлық-эпидемиологиялық нормаларды бұзғаны үшін салынатын айыппұл мөлшерін 50%-ға қысқартуды ұсынған болатын. Мәжілісмендер айыппұл көлемінің көптігі бизнесмендерді сыбайлас жемқорлық қылмысына итермелейді деп санайды.
