Елімізде жол-көлік оқиғаларының саны 15%-ға азайды

Былтыр халықаралық және республикалық маңызы бар автомобиль жолдарында 2154 жол-көлік оқиғасы орын алды. Бұл 2019 жылмен салыстырғанда 15%-ға аз. Бұл туралы ҚР Индустрия және инфрақұрылымдық даму министрлігінің баспасөз қызметі хабарлады.  

2020 жылдың 12 айында жол-көлік оқиғалары кезінде 741 адам көз жұмып, 3304 адам жарақат алған. 2019 жылмен салыстырғанда ЖКО 15%-ға (немесе 393 апатқа) төмендеп отыр. Жарақат алғандар 23%-ға (немесе 1007 адамға), ал көз жұмғандар саны 27%-ға (немесе 278 адамға) азайды.  

Жыл басынан бері ай сайын жүргізілген талдау апаттың Батыс Қазақстан облысында (4%), сондай-ақ, Қарағанды (8%) және Қызылорда (7%) облыстарында артқанын көрсетеді.

Мерт болғандар саны бойынша жағымсыз статистиканың көш басында Павлодар (6%) мен Солтүстік Қазақстан облыстары (42%) тұр. Жарақат алғандар бойынша өсім Қарағанды (18%) және Қостанай облыстарында (6%) байқалады.

Мамандар жол-көлік оқиғаларына, бірінші кезекте, жол қозғалысы ережелерінің сақталмауы себеп болатынын алға тартады. Орын алатын апаттардың 37,9% -ы – жылдамдықты асырғаннан болуда.