Білім және ғылым министрі Асхат Аймағамбетов елімізде 9 және 11 сынып түлектері үшін соңғы қоңырау рәсімін өткізуге рұқсат берді. Бұл туралы Tengrinews.kz сайты хабарлады.
«Соңғы қоңырау 25 мамырда оқу жылының үшінші тоқсанынан бері офлайн режимде оқып жатқан 9 және 11 сынып түлектері үшін өткізіледі. Сондай-ақ, санитария талаптарын қатаң сақтай отырып, 25 мамырға арналған іс-шаралар, соңғы қоңырау және биыл маусымның ортасында өтетін аттестат тапсыру офлайн режимде өтеді деп жоспарлап отырмыз», – деді министр аппарат жиналысында.
Білім және ғылым министрі білім басқармаларына барлық санитарлық-эпидемиологиялық талапты сақтай отырып, іс-шараны ұйымдастыруды тапсырды.
