«Атамекен» Ұлттық кәсіпкерлер палатасы күні кеше «Бастау Бизнес» жобасының 5 жылдық жұмысын қорытындылады. Нұр-Сұлтан қаласында жоба түлектері өнімдерінен көрме ұйымдастырылып, онлайн-форум өтті. Осы 5 жылда 185 мыңға жуық қазақстандық кәсіпкерлік негізін оқып, 53 мың бизнес-жоба жүзеге асырылды, деп хабарлайды «Атамекен» ҰКП.
Биыл жыл басынан бері «Атамекен» ауыл азаматтарын кәсіпкерлік негіздеріне оқытып қана қоймай, бизнес-жобаларды қаржыландырады және сүйемелдейді. Ол үшін еліміз бойынша 15 микроқаржы ұйымы құрылды. Жеңілдікпен несие беруге мемлекет 22,5 млрд теңге бөлді.
Төралқа төрағасы Тимур Құлыбаев қазір өтінімдерді қарау және ақша беру бойынша жұмыс қарқынды жүріп жатқанын атап өтті.
«Атамекен» микроқаржы ұйымдарына 2 мыңға жуық өтінім түсті. Берілген микронесиелердің нәтижесі бойынша бес мыңнан аса кәсіпорын мен кемінде он мың жұмыс орнының ашылуы, сондай-ақ бюджетке төленетін салық төлемінің ұлғаюы күтілуде. Бес жыл ішінде «Бастау Бизнес» нағыз халықтың жобасына айналды, әсіресе, ауылдық жерлерде жүздеген мың қазақстандықтың өмірін өзгертуге мүмкіндік берді деп сеніммен айта аламыз. Елді мекендерде жобаға деген сұраныс жоғары» деді Тимур Құлыбаев.
2021 жылы «Бастау Бизнес» жобасы аясында 30 мың қазақстандық білім алған. Олардың арасында елордалық Татьяна Куснутдинова. Форум барысында ол түзету орталығын қалай ашқанын айтып берді. Татьянаның баласына дәрігерлер аутизм диагнозын қойған. 15 жылдық тәжірибесі бар педагог бірнеше жыл бұрын баласын оңалту үшін Ақмола облысынан көшіп келген. Кейін логопед-дефектолог ретінде білім алған Татьяна ұлын аяғына тұрғызып, өзі секілді аналарға көмектесу үшін жұмысын жалғастырған.
«Баламның диагнозын жеңіп шыққанда, жеке түзету орталығын ашу қажеттігін түсіндім. Жабдық алуға қаражат болмаған соң, мемлекеттен қолдау табуға тырыстым. 2021 жылғы маусымда «Бастау Бизнес» жобасына қатыстым. Екі ай бұрын 5 млн теңге грант алып, БАК және ИНтайм атты екі аппараттық әдістемені сатып алдым. Енді мен ұлым сияқты балаларға көмектесе аламын. Сондай-ақ, жұмыс орындарын ашамын. Қазір алты адамды жұмыспен қамтып отырмын, тағы үш адамды қабылдаймын» деді Татьяна Куснутдинова.
Бес жылда 185 мыңға жуық адам кәсіпкерлік негіздерін оқыды. Олар 53 мың бизнес-жобаны іс жүзіне асырды. Яғни, «Бастау Бизнес» жобасының әр үшінші түлегі өз кәсібін бастаған. Жоба түлектері 70 мыңға жуық жұмыс орнын ашып, 1,5 млрд теңгеден аса салық төледі. «Бастау Бизнес» жобасы Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасы аясында жүзеге асырылып жатыр.
Анықтама:
«Бастау Бизнес» жобасының тарихы 2016 жылы басталды. Пилоттық жоба Маңғыстау облысының Мұнайлы ауданында, Жаңаөзенде және Ақтөбе облысының Темір ауданында іске қосылды. Тура бір жылдан кейін «Бастау Бизнес» Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасының екінші бағытын оқыту форматы ретінде қабылданды.
2017 жылы 80 ауданның ауылдарындағы 15 мың тұрғын оқып, әрбір бесінші азамат (3 314 немесе 22%) жобасын іске асырды.
Жыл сайын жоба ауқымы мен әлеуметтік маңызы кеңейе түсті. 2018 жылы қалалар мен моноқалалардың жұмыссыз және өзін-өзі жұмыспен қамтыған тұрғындары оқуға тартылып, 160 аудан қамтылды. 2019 жылдан бастап жобаға Нұр-Сұлтан, Алматы және Шымкент қалалары қатысып келеді. 2018 жылы 30 мыңға жуық адам оқыды, ал 2019 жылы жоба қатысушысы 75 мың қатысушыға дейін көбейді. 2019 жылы NEET санатындағы жұмыссыз жастарға, жас отбасы мүшелеріне, көпбалалы, аз қамтылған отбасыларға және еңбекке қабілетті мүгедектерге ерекше назар аударылды.
