Олимпиада ойындарына тікелей қатысуға кеткен шығын 248 миллион теңгені құрады
Қазақстан құрамасының Бейжіңдегі Қысқы Олимпиада ойындарына сапары 248 миллион теңге құрады. Оның 107 миллион теңгесі рейс құны, деп хабарлады Ұлттық Олимпиада комитетінің (ҰОК) бас хатшысы Андрей Крюков, деп хабарлайды Интерфакс.
«Олимпиада ойындарына тікелей қатысу құны 248 млн теңгені құрады, оның 107 млн теңгесі «Эйр Астана» әуе компаниясына чартер беру үшін төленген», – деді Крюков.
Сонымен қатар, оның айтуынша, ойындарға командаларды дайындауға 789 миллион теңге жұмсалған.
«Дайындық оқу-жаттығу жиындары мен жарыстарға 234 спортшы мен жаттықтырушы қатысты», – деді ол.
Қысқы спорт түрлеріне бюджетте барлығы 3,5 млрд теңге қарастырылған.
Хабарланғандай, Бейжің Олимпиадасына Қазақстан атынан 34 спортшы қатысты. Ұлттық құрама 2022 жылғы қысқы ойындарда бірде-бір медаль ала алмады.
