2021 жылы жалпы көлемі 93,7 трлн теңге сомаға 6,5 млрд операция жүргізілді
![](https://kz.kursiv.media/wp-content/uploads/2022/03/1485599689_article_b.jpeg)
Қазақстандық банктердің төлем карточкалары арқылы 2021 жылы жалпы көлемі 93,7 трлн теңге сомаға 6,5 млрд операция жүргізілді (2020 жылы – 52 трлн теңге сомаға 3,2 млрд операция жүргізілген). Бұл туралы ҚР Ұлттық Банк баспасөз қызметі хабарлады.
Төлем карточкалары бойынша операциялар көлемінің 78% (73,1 трлн теңге) қолма-қол ақшасыз тәсілмен жүргізілді және 22% (20,6 трлн теңге) банкоматтардан қолма-қол ақша алуға келеді.
2021 жылы әр бес қолма-қол ақшасыз операцияның үшеуі интернет және мобильді банкинг арқылы жүргізілді, олардың үлесі жалпы көлемнен 83% құрады. Орташа алғанда, интернет және мобильді банкинг арқылы жүргізілген күнделікті операциялар көлемі жалпы сомасы 167 млрд теңгеден артық 11,5 млн-нан асты.
Төлем карточкаларын пайдалана отырып, тауарлар мен қызметтерге ақы төлеу үшін инфрақұрылым кеңеюде. POS-терминалдардың саны 2,4 есеге өсіп, 509 мың бірлікті құрады. Нарықтағы POS-терминалдардың 97% жанасусыз төлем функциясын қолдайды.
Төлем карточкаларын қабылдайтын кәсіпкерлер саны 2,5 есеге өсіп, 274 мыңды құрады.