Кәсіпкерлікті дамыту ұлттық жобасына 185 мың адам қатысты

2021 – 2025 жылдарға арналған кәсіпкерлікті дамыту жөніндегі ұлттық жобаа жыл басынан бері 185 мың адам қатысқан. 167,1 мың адам жұмысқа орналастырылды. Оның 91,2 мыңы тұрақты жұмыс тапты, деп хабарлайды Еңбек және халықты әлеуметтік қорғау министрлігі.

Жұмыс берушілердің өтініші бойынша 3,4 мың адам оқу үшін оқыту ұйымдарына жіберілді.

1,5 мың адам өз кәсібін бастауға мемлекеттік грант алды.

Субсидияланатын жұмыс орындарына 82,5 мың адам орналастырылды. Әлеуметтік жұмыс орындарымен 11,4 мың, жастар практикасымен 8,6 мың, қоғамдық жұмыстармен 61,1 мың адам қамтылды. «Алғашқы жұмыс орны» жобасы аясында 1,1 мың, «Ұрпақтар келісімшарты» жобасы аясында 138 адам,  «Күміс жас» жобасы аясында 226 адам жұмыспен қамтылды.    

Еске салайық, бұған дейін халықты жұмыспен қамтуға арналған шаралар Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасы аясында жүзеге асырылды. 2021 жылы бағдарламаға 651,8 мың адам қатысты.

Мемлекеттік бағдарламаға қатысушылар тұрақты және субсидияланатын жұмыс орындарымен қамтылды. Сондай-ақ оларға кәсіпкерлікті дамыту үшін микронесие мен қайтарымсыз мемлекеттік грант беріліп, қолдау көрсетілді. Қысқа мерзімді курстарда және кәсіптік-техникалық ұйымдарда оқытылды.