Шалғай ауылдар цифрлы үкіметтің қызығын көрер күн жақын
Цифрлық даму, инновациялар және аэроғарыш өнеркәсібі министрі Бағдат Мусин шалғай ауылдарда «цифрлық нүктелер» пайда болады дейді. Бұл туралы әлеуметтік желідегі парақшасына жазды.
Министр кеше Үкімет отырысында мемлекеттік қызметтерді цифрландыру барысын айтып, сосын Сенат депутаттары алдында жаңа заңжоба бойынша баяндама жасаған.
Заң жобасында инновация, цифровизация және ақпараттық қауіпсіздік саласына өзгерістер мен онлайн-қызметтерді жылдамырақ енгізуді көздейтін іс-шаралар қарастырылған.
Министрдің айтуынша, ол бірінші кезекте, мемлекеттік аппаратты бюрократиядан арылту, яғни адами факторды азайтып, қызмет көрсету уақытын қысқартуға бағытталған. Платформалық модель мен бірыңғай архитектура қалыптастыру арқылы шығыны көп шашыраңқы ақпараттық жүйелерді реттеп, қажетсіз базаларды қысқартуға болады. Нәтижесінде, мемлекеттік қызметтерді көрсету жылдамдығы артып, азаматтарға да, мемлекеттік органдарға да қолайлы және тиімді жағдай жасалады.
«Шалғай ауылдарда тұратын қазақстандықтар үшін «цифрлық нүктелер» ашылады. Бұл мәселені Қазпоштада жұмыс істеп жүргенде көтерген едім. Бәріне белгілі, Қазақстанның түкпір-түкпірінде, тіпті ең шалғай ауылдарында Қазпоштаның ғана бөлімшелері бар, сондықтан осы бөлімшелерде тек пошта қызметтері емес, мемлекеттік қызметтерді де ұсынылатын болады. Әйтпесе тұрғындар қаладағы немесе аудан орталығындағы ХҚКО-ға баруға мәжбүр. Цифрлық құжаттар мәселесіне келсек, заңда цифрлық құжаттар қағаз нұсқамен тең дәрежеде қолданылатыны туралы норма қарастырылған. Сондай-ақ жуырда қазақстандықтар жеке куәлікті 5-10 минуттың ішінде ала алатын болады. Біз ІІМ-мен бірге біртіндеп арнайы терминалдарды қолданысқа енгіземіз, сөйтіп құжаттарды миграция мамандарына жүгінбей-ақ, терминал арқылы ресімдеуге болады» деді министр.
Бағдат Мусин алыс елдімекендерді байланыспен қамту мәселесіне байланыс желісін электр жеткізу желілерінің бағандары арқылы өткізу арқылы шешпек. Яғни электр жеткізу желілері бар жерге байланыс та өткізіледі. Ал, мұндай мүмкіндік болмаған жерлерге спутник арқылы жеткізіледі.
«Әлеуметтік саладағы цифрландыру жұмыстарының қарқыны да бәсеңдемеуі тиіс. Бұған дейін мүгедектікті растайтын құжат алу үшін бірнеше мекемені аралап, түрлі анықтамалар жинау керек болатын. Біз бұл процесті қайта қарастырдық, енді көп ұзамай ерекше қажеттілігі бар тұлғалар мүгедектігін куәландыру үшін түрлі мекемелерді араламай-ақ, бір ғана мекемеге – өздерінің емханаларына жүгінетін болады. Көпбалалы аналарға да жәрдемақы проактивті түрде тағайындалады. Енді олар жәрдемақы ресімдеу үшін құжат жинап жүрмейді, қызмет автоматты түрде көрсетіледі» деді министр.
Үдерістерді ашық және жариялы жүргізуге жол ашылады. Мысалы, алқа билерді іріктеу процесі автоматтандырылып, көмірсутек шикізаты бойынша жер қойнауын пайдалану құқығын беруге арналған аукциондар электронды түрде өткізіледі.
Жаңа заңжобаның басты міндеті – азаматтар мен мемлекеттік органдардың өзара байланысын нығайту. Арыз-шағымдар, өтініштер мен басқа да құжаттарды әп-сәтте жолдауға болады.
