Құстар ұшақтарға жиі соқтығысатын болған

Әуе кемелерінің құстармен соқтығысу жағдайларын азайту жедел шешімдер қабылдауды талап етеді – ҚР ИИДМ
Соңғы уақыттарда әуе кемелерінің құстармен соқтығысу жағдайлары жиілеп кетті. Салдарынан авиакомпаниялар рейстердің кешіктірілуіне және әуе кемелерін жөндеуге байланысты қомақты шығынға ұшырауда.
«ҚР әуе кеңістігін пайдалану және авиация қызметі туралы» Заңына сәйкес ұшуды орнитологиялық қамтамасыз ету Қазақстанның авиациялық әкімшілігіне жүктелген. Сонымен қатар ҚАӘ ұшу қауіпсіздігін қамтамасыз ету бойынша бақылау мен қадағалауға да жауапты. Ұшу кезіндегі осындай олқылықты жайттардың алдын алу және азайту мақсатында ҚР Индустрия және инфрақұрылымдық даму министрлігінің Азаматтық авиация комитеті жергілікті атқарушы органдармен бірлесіп жедел кеңес өткізді. Алматы қаласы, Алматы облысы әкімдіктері және бірқатар отандық авиакомпаниялар мен әуежайлардың өкілдері қатысқан арнайы басқосуда әуе кемелерінің құстармен қақтығысу жағдайларын азайту туралы мәселе қарастырылды.
Қазақстанның авиация әкімшілігінің ақпаратына сүйенер болсақ, биыл еліміздің бірқатар әуежайының жауапкершілік аймағында ұшақтардың құстармен соқтығысуының 46 жағдайы тіркелді. Оқыс оқиғалар әсіресе Алматы әуежайында жиі байқалып отыр.
Сарапшылардың айтуынша, құстармен соқтығысу маусымдық сипатқа ие. Қақтығыстардың басым бөлігі құстардың көктем және күздегі көші-қон кезінде және жылдың жылы маусымдарында көптеп орын алады. Жыл сайын осы тақілеттес оқиғалар шілде немесе тамыз айларында жиі болады.
Мамандардың пайымдауынша, құстардың соқтығысуын толығымен жою мүмкін емес. Алайда бұл қауіпті едәуір азайтуға мүмкіндік бар. Қазақстанның азаматтық әкімшілігі сертификаттық және инспекциялық тексерулер жүргізу барысында әуежайларды пайдаланушылардың ұлттық заңнама талаптарын сақтауын тексереді. Оның ішінде әуежайдағы ұшу-қону жолағы ауданында патрульдеуді қамтамасыз етуді, пиротехникалық құралдарды, газ зеңбіректерін, биоакустикалық құрылғыларды, лазерлерді және өзге де құралдарды қолдана отырып құстарды үркітуді қамтамасыз ету қажет. Сондай-ақ құстардың ұшуы туралы ақпаратты диспетчерлер хабардар етуі тиіс.
Кеңес қорытындысы бойынша жергілікті атқарушы орган өкілдері жиында көтерілген мәселелерді оңтайлы әрі жедел шешуге ықпал ететіндігін жеткізіп, бұл орайда әуежай әкімшілігімен бірлесіп жұмыс істеуге даяр екендіктерін білдірді.
«Бұл тұрғыда тиісті іс-шаралар қолға алынып, сәйкес жұмыстар жүргізілуде. Осы ретте әуежай аймағындағы заңсыз нысандарды жоюға бюджеттен тиісті қаржының бөлінбеуі қол байлау болып отыр», – дейді Алматы қаласы әкімдігінің өкілі.
Жиын қорытындысы бойынша құстардың көптеп шоғырлануына әсер ететін заңсыз нысандарды жоюды жеделдетіп, осы мақсаттағы қаржыландыру көлемін арттыру ұсынылды.
Бұл мәселе бүгінде ведомствоның ерекше бақылауында.
ҚР ИИДМ баспасөз қызметі