Депозиттеріңізге өтемақы төлейміз дейтін алаяқтар шыға бастады

Қазақстанның депозиттерге кепілдік беру қоры (бұдан әрі – ҚДКБҚ) жеке тұлғалардың теңгедегі депозиттері бойынша 10% көлемінде өтемақы (сыйлық) төлеу бағдарламасы аясында әлеуметтік желілерде қаржылық алаяқтардың белсенді бола бастағанын атап өтеді.

Соңғы уақытта шабуылдаушылар жеке пайдаланушы деректерін жинау үшін фишингтік хабарламалар мен сайттарды жиі пайдаланады. Сондай-ақ ҚДКБҚ әлеуметтік желілерде депозиттер бойынша өтемақы алу үшін «тіркеуге» бір-ақ апта ғана қалды деген сияқты жалған ақпараттың таралғанын тіркеді.

«Өтемақы алу үшін тіркелу қажет емес. Қазақстандық банктердің салымшылары 2023 жылдың 1 қаңтарына дейін 10 пайыздық өтемақы алуға келісім беру үшін банкке жүгінуге құқылы. Сіз мұны тікелей банктің өзінде немесе онлайн режимінде, төлемдер мен аударымдар үшін пайдаланатын банкіңіздің ресми мобильді қосымшасында жасай аласыз. Өтемақы төлеуге қатысты сұрақтар бойынша депозитіңіз бар банкке тікелей хабарласуға кеңес береміз. Азаматтарды ақпарат арналарын міндетті түрде тексеріп, тек ресми дереккөздерге сенуге шақырамыз», – дейді Депозиттерге кепілдік беру қорының сарапшылары.

Сондай-ақ ҚДКБҚ интернетте өтемақы төлеу туралы күмәнді жарнамаларды елемеу және жеке деректерді белгісіз адамдарға жарияламауды ескертті.

Қазақстандық банктер салымшылардан өтемақы (сыйлықақы) төлеуге келісім беру туралы өтініштерді қабылдауды жалғастыруда. Төлемдерді банктер 2023 жылғы 23 ақпаннан кейін Ережеде белгіленген мерзімдерде жүзеге асырады.

Ақпарат Қазақстанның депозиттерге кепілдік беру қорынан алынды.