Биыл елімізде 1,6 млн жеке кәсіпкер тіркелген, бұл бір жыл бұрынғы көрсеткіштен 24,3% артық. Бүкіл ЖК субъектілерінің 93,1%-ы жұмыс істеп тұр, олардың қатары бір жылда 30,7% өсіп, 1,5 млн-ға жетті, деп хабарлайды finprom.kz.
Салыстырар болсақ, былтырғы сәйкес кезеңде елімізде 1,1 млн жеке кәсіпкер тіркелсе, бұл бір жыл бұрынғы көрсеткіштен 5,1% артық.
Өңірлер бойынша алсақ, жеке кәсіпкерлердің басым бөлігі Алматыда жұмыс істеді: 195,1 мың, олардың қатары бір жылда 56,7% көбейген. Екінші және үшінші орында Түркістан облысы (172,8 мың жеке кәсіпкер, 28,6% көбейген) мен елорда (137 мың жеке кәсіпкер, 30,1% көбейген) келеді.
Ең жоғары жылдық өсім Шымкент қаласында (59,5% ұлғайып, 90,6 мыңға жетті), ең төменгі өсім – Солтүстік Қазақстан облысында (9,2% көбейіп, 26,2 мың болды). Еліміздің 20 өңірінің үшеуінде: Шығыс Қазақстан, Алматы және Қарағанды облыстарында жеке кәсіпкерлер саны азайды.
Жеке кәсіпкерлердің үштен бірінен астамы (36,5%) көтерме-бөлшек сауда және автожөндеу саласында: 539,2 мың жеке кәсіпкерлер – бір жыл бұрынғыдан 47,2% артық.
Сондай-ақ жеке кәсіпкерлердің ең көп жұмыс істейтін салалары: агроөнеркәсіптік кешен, жылжымайтын мүлікпен операциялар, өңдеу өнеркәсібі және көлік-логистика секторы.
«2023 жылдың қаңтарынан бастап республикада кәсіпкерлік саласындағы міндетті талаптардың тізілімі – мемлекеттік нормативтік актілерді тұрақты негізде қайта қарауды қамтамасыз ететін тетік жұмыс істей бастайды», деп хабарлайды ҚР премьер-министрінің ақпараттық ресурсы.
Тізілімде талаптар болмаса немесе олар бойынша белгіленген мерзім қаралмаса, кәсіпкерлік субъектілері оларды бұзғаны үшін әкімшілік жауапкершіліктен босатылады. 1 қаңтардан бастап ерекше тәртіп бойынша жүргізілген тексерулер жойылып, тексеру мен жазалаудан заң бұзушылықтың алдын алуға көшті.
