Дәретхана қағазы бір жылда бір жарым еседен артық қымбаттаған
![](https://kz.kursiv.media/wp-content/uploads/2023/02/unnamed-file.jpg)
2022 жылдың қаңтар–желтоқсан айларында елде 26,8 мың тонна дәретхана қағазы өндірілді, бұл бір жыл бұрынғыдан бірден 23,7% аз- деп, хабарлайды energyprom.kz сайты
Өңірлер бойынша өндірістің негізгі көлемі Алматы қаласына тиесілі: ҚР-ның 86,2%-ы немесе жылына 23,1 мың тонна, бір жыл бұрынғыдан 21,9% азайған. Екінші және үшінші орында Қарағанды облысы (1,1 мың тонна, 20,1% көбейген) және Шымкент (802,9 тонна, 52,8% азайған).
Анықтама үшін: 2021 жылы жергілікті кәсіпорындар 34,9 мың тонна дәретхана қағазын өндірді, бұл бір жыл бұрынғы көрсеткіштен 5,3% аз.
2022 жылдың қаңтар–қараша айларының қорытындылары бойынша, отандық компаниялар дәретхана қағазына сұранысты (ішкі нарықтағы сату және экспорт) бір жыл бұрынғы 66,8%-бен салыстырғанда 61,2% қамтамасыз етті. Импорттың үлесі тиісінше 38,8%-ды құрады. Елге 14,9 мың тонна өнім әкелінді, бұл бір жыл бұрынғыдан 9,1% аз.
Экспортқа Қазақстан 243,4 тонна дәретхана қағазын жіберді, бір жыл бұрынғыдан 16,5% көп. Ішкі нарықта сату 22,6% төмендеп, 38,1 мың тоннаны құрады.
Биылғы қаңтар қорытындысы бойынша, дәретхана қағазы өткен жылдың қаңтарымен салыстырғанда 51,7% қымбаттаған.
Өңірлер бойынша ең жоғары баға өсімі елордада тіркелді: бірден 83% қымбаттады. Одан кейін Атырау (71,6% қымбаттады), Абай (69,7%) және Павлодар (68,5%) облыстары мен Алматы қаласы (67,2%).
Бағаның ең аз жылдық өсімі Қызылорда облысында тіркелді: 13%.