Бас әскери прокуратура: «Шөлдала» шекара заставасында жыныстық зорлық-зомбылық болған жоқ
![](https://kz.kursiv.media/wp-content/uploads/2023/02/shutterstock_1115351336-1-1-1024x683.webp)
2022 жылдың тамызында «Шөлдала» шекара заставасында мерзімді әскери қызметшісі Б. Мираштың қайтыс болуына байланысты қозғалған іске қатысты Бас әскери прокуратура арнайы ақпарат таратты.
Бүгінгі күні билікті асыра пайдалану арқылы өзін-өзі өлтіруге дейін жеткізу бойынша сол заставаның келісімшарт бойынша әскери қызметшісі күдікті деп танылды. Қылмыстық Іс материалдарына сәйкес ол Б.Мирашты және онымен бірге әскерге шақырылған басқа да мерзімді әскери қызметкерлерді жүйелі түрде психологиялық тұрғыда қорлап, соққыға жыққан.
Күдікті қамауға алынып, тергеу жалғасуда және ерекше бақылауға алынған. Тергеу барысында болған оқиғаның барлық нұсқалары, соның ішінде жыныстық зорлық-зомбылық мүмкіндігі тексерілді. Алайда, бұл дерек расталмаған.
Адвокаттың өтінішхаттары белгіленген мерзімде қаралды және қылмыстық іс жүргізу заңнамасы тәртібімен қанағаттандырылды. Адвокат С. Пралиевтің қылмыстық істің мән-жайларын жариялау жөніндегі әрекеттерінің заңдылығын уәкілетті орган, адвокаттардың тәртіптік комиссиясы қарайды.
Қылмыстық-процестік кодекстің 201-бабына сәйкес жеке өмірге, жеке және отбасылық құпияға қол сұғылмаушылықты ескере отырып, сотқа дейінгі тергеп-тексеру жөніндегі өзге де ақпарат жария етілуге жатпайды.