Мемлекет басшысы Қауіпсіздік Кеңесінің отырысын өткізді

Президенттің баспасөз қызметі бүгін Қасым-Жомарт Тоқаевтың төрағалығымен Қазақстан Республикасы Қауіпсіздік Кеңесінің кезекті отырысы өткенін хабарлады.

«Жиында 2021-2025 жылдарға арналған Ұлттық қауіпсіздік стратегиясын жүзеге асыру аясында қабылданған Ұлттық қауіпсіздікке төнетін қатерлердің алдын алу жөніндегі іс-қимыл жоспарының орындалу мәселелері қарастырылды», делінген ақпаратта.

Баспасөз қызметінің хабарлауынша, отырыс барысында Премьер-Министрдің бірінші орынбасары Роман Скляр баяндама жасады. Сондай-ақ бірқатар мүдделі мемлекеттік орган басшылары мәлімет берді.

«Мемлекет басшысы қазіргі жағдайда сын-қатерлер мен ұлттық қауіпсіздікке төнетін қауіпке объективті баға беріп, тиісті шараларды әзірлеу қажет екенін атап өтті», делінген хабарламада.

Ақпаратқа сәйкес, жиын соңында ұлттық қауіпсіздікке төнетін қатерлердің алдын алу және ұлттық мүддені қорғау жүйелерінің тиімділігін арттыруға бағытталған шешімдер қабылданды.