«Қазатомөнеркәсіп» сирек кездесетін металдарды игеруге лицензия алу бойынша жұмыс жүргізуде
«Қазатомөнеркәсіп» сирек кездесетін металдарды игеруге лицензия алу бойынша жұмыс жүргізуде, деп хабарлады компанияның Басқарма төрағасы Ержан Мұқанов.
«Қазіргі уақытта біз Қазақстан Республикасының аумағында сирек кездесетін кен орындарын игеруге лицензия алу бойынша жұмыс жүргізіп жатырмыз. Бұл жұмысты аяқтаған кезде, біз бұл туралы міндетті түрде хабарлаймыз. Жалпы, қазіргі уақытта біз шикізатты нарықта сатып алып жатырмыз. Тұтастай алғанда кәсіпорынның өзінде белгілі бір қорлар бар, олар бірнеше жыл бойы осы өндірістердің үздіксіз жұмысын қамтамасыз етуге мүмкіндік береді», – деді ол.
Атап айтқанда, «Қазатомөнеркәсіптің» еншілес компаниясы – «Үлбі металлургия зауытына» (ҮМЗ) – бериллий мен тантал қажет. Үлбі металлургия зауыты ТМД-да жалғыз тантал өндірісіне ие кәсіпорындардың бірі болып табылады.
Мұқанов сондай-ақ, Түркістан облысында күкірт қышқылын шығаратын зауыт салу жөніндегі жобаның іске асырылғаны туралы хабарлады. Оның айтуынша, қазіргі уақытта жоба техникалық-экономикалық негіздемені әзірлеуді аяқтау сатысында тұр.
«Біз осы жылдың ортасында жобалау-сметалық құжаттаманы әзірлеуге көшуді жоспарлап отырмыз. Құрылыстың басталуы келесі жылдың бірінші жартысына жоспарланып отыр. Жалпы, осы жобаның құрылысын 2025 жылдың соңында және өндірісті бастауды және толық өндірістік қуатқа шығуды – 2026 жылы аяқтауды жоспарлап отырмыз. Бұл жобаның жобалық қуаты 800 мың тонна күкірт қышқылына ие болады. Онда 500-ге жуық жұмыс орны қамтылады», – деді ол.
