Ішкі істер министрлігі жүргізуші куәлігін бермес бұрын сынақ мерзімін енгізуді қарастырып жатыр, деп хабарлайды Polisia.kz.
Бұл туралы «Қазавтожол» АҚ, «Атамекен» ҰКП және Қазақ жол қозғалысы қауіпсіздігі ғылыми-зерттеу институты өкілдері бас қосқан кеңесте айтылды. Жиында жол апатына не себеп болатыны талқылады. Кеңеске қатысушылар Финляндияның тәжірибесін де қарастырды.
«Бұл елдің тәжірибесінде жүргізуші куәлігі 2 жылдық сынақ мерзімінен және бірқатар емтихандардан өткеннен кейін беріледі. Қазір елімізде осындай тәжірибені енгізу дұрыстығы мен мүмкіндігі қарастырылып жатыр», – делінген ішкі істер министрлігі таратқан ақпаратта.
Айта кетейік, жол-көлік оқиғасы салдарынан өлім-жітімді азайту жөніндегі осы және басқа да шаралар Қоғамдық қауіпсіздікті қоғаммен серіктестікте қамтамасыз етудің 2024-2028 жылдарға арналған тұжырымдамасына негізделеді.
