Шетелдегі әскери соғысқа қатысқандар Қазақстанға оралғанда сотталады. Бұл туралы Сыртқы істер министрлігінің ресми өкілі Айбек Смадияров мәлімдеді.
«Қазақстан азаматы өз еркімен ЧВК «Вагнер» қатарына қосылған. Олардың қатарына қосылуға ниет танытқандарға 5 жылдан 9 жылға дейін бас бостандығынан айыру жазасы қарастырылғанын ескертеміз. Олар ойлағандай ол жерде романтика жоқ. Бұл біздің соғыс емес. Сақ болыңыздар. Жақындарыңызды ойладыңыздар», – деді Айбек Смадияров.
Осыған байланысты СІМ ресми өкілі қазақстандықтарға ескерту жасады.
«Бәріміз ересек адамбыз. Бұл жігіт те кәмелет жасына толған. Біз оларға көмектесіп жатырмыз, оның ата-анасымен байланыстамыз. Барлық тиісті сұрақ Ресей Федерациясының құзыретті органдарына жіберілді. Біз ақпаратты тексереміз және мүмкіндігінше толық көмек көрсетеміз. Бірақ ол Қазақстанға оралғанда ол қылмыстық қудалауға ұшырайтыны ескертеміз», – деді ресми өкіл.
Сондай-ақ Айбек Смадияров Оңтүстік Кореядағы қазақстандықтардың құқығын қорғау үшін келіссөз жүргізілетінін хабарлады.
Айтуынша, 2023 жылдың сәуірінде Сеул қаласында Қазақстан мен Корея Республикасының сыртқы саяси ведомстволар арасында консулдық консултациялардың 7-раунды өтеді.
«Іс-шарада Оңтүстік Кореядағы Қазақстан азаматтарының құқығы мен мүддесін қорғау, оның ішінде еңбек рұқсаттары жүйесін құру мәселелерін талқылау жоспарланып отыр», – деді Айбек Смадияров.
Оның айтуынша, қос тарап Қазақстан мен Оңтүстік Корея Үкіметтерінің арасында еңбек мигранттарының (қазақстандықтар) қызметі және олардың құқығын қорғау келісім жобасын қарайды.
