ДДҰ мәліметтері бойынша, Суданда содырлар полиомиелит, тырысқақ және қызылша сияқты қауіпті аурулардың үлгілері бар орталық мемлекеттік зертхананы басып алған. Бұл туралы РБК хабарлады.
ДДҰ-ның Судандағы өкілі Нима Саид Абид қауіпті аурулардың үлгілері бар зертхананы қақтығыс тараптарының бірі басып алғанын хабарлады.
«Денсаулық сақтау жүйесінің орталық зертханасын басып алуға байланысты үлкен биологиялық қауіп бар», – деді ол.
«Бұл өте қауіпті, өйткені бізде зертханада полиомиелит, қызылша, тырысқақ үлгілері бар», – деп атап өтті Нима Саид Абид.
Ұйымның соңғы мәліметтері бойынша, Судандағы қақтығыс нәтижесінде 450-ден астам адам қаза тауып, 4 мыңнан астам адам зардап шекті.
