Әлемде гибридті соғыс жүріп жатыр – Қ.Тоқаев
![](https://kz.kursiv.media/wp-content/uploads/2023/05/soveshhanie-1024x683.jpeg)
Фото: Kursiv.media
Қазақстан Қарулы Күштерінің Жоғарғы Бас қолбасшысы Қасым-Жомарт Тоқаевтың төрағалығымен өткен Бүкілармиялық кеңесте әлемде гибридті соғыс жүріп жатқанын, сол себепті күштік құрылымдардың заман талабына сай болу қажет екенін айтты.
«Күштік құрылымдар жаңа талапқа сай болуы қажет. Қазір Арнайы операциялар күштерінің қолбасшылығы құрылды. Сондай-ақ десанттық-шабуылдаушы әскердің қарым-қабілетін арттыру үшін нақты жұмыс жүргізіліп жатыр. Аумақтық қорғаныстың әлеуеті күшейтілуде. Азаматтық қорғаныс бөлімшелері құрылып жатыр. Арнайы жасақ бөлімдерін дамыту ісі тың қарқынмен жалғасуда. Осы жұмыстың бәрін уақтылы аяқтау керек. Олар біртіндеп қажетті жабдықтармен қамтамасыз етілуге тиіс», деді Қасым-Жомарт Тоқаев.
Сондақтан, Мемлекет басшысы әскери мамандар даярлау үшін басқа да жоғары оқу орындарының мүмкіндігін кеңінен пайдалануды ұсынды.
«Әскери білім және ғылым жүйесін дамыту – аса маңызды міндет. Әскери академиялар, институттар әлемдік стандарттарға сай болуға тиіс. Осы саладағы жоғары оқу орындарының материалдық базасын нығайту керек. Сондай-ақ оқу бағдарламасын заман талабына сай бейімдеу қажет. Қазіргі қақтығыстардың сипаты мүлде бөлек. Әлемде гибридті соғыс жүріп жатыр. Сондықтан Қарулы Күштердің зияткерлік қабілетін арттыру – өте маңызды міндет. Білім мен тәрбие әрдайым бірін-бірі толықтырып отыруы қажет», деді Қ.Тоқаев.
Астанада Бүкілармиялық кеңес өтіп жатыр. Онда Президент биыл әскери ұшқыштардың жалақысы 60 пайызға өсетінін мәлім еткен болатын.