Алматыда ең үздік мектеп 56 млн теңге көлемінде грант алады
Алматы қаласында «Орта білім берудің үздік ұйымы» грантын беруге арналған жыл сайынғы байқаудың қалалық кезеңі басталды. Байқау комиссиясының жұмысы 30 маусымда аяқталады. Бұл туралы ҚазАқпарат хабарлады.
Байқаудың басты мақсаты – тиімді педагогикалық және басқарушылық тәжірибені жинақтау мен тарату. Сонымен қатар, ҚР орта білім беру жүйесінің даму үрдістерін анықтау.
Қаладағы жоғары рейтингтік көрсеткіштерге қол жеткізу үшін қатысушыларды іріктеу мынадай критерийлер бойынша жүзеге асады:
– оқытуда ақпараттық-коммуникациялық технологияларды енгізу;
– сапалы білім берудің қолжетімділігін қамтамасыз ету;
– кадрлық қамтамасыз ету;
– материалдық-техникалық қамтамасыз ету;
– білім алушылардың денсаулығын сақтау үшін жағдайлар жасау, олардың қауіпсіздігін қамтамасыз ету;
– педагогтер мен басшылардың кәсіби және жеке өзін-өзі дамыту үшін жағдайлар жасау;
– инклюзивті білім беру үшін жағдай жасау;
– соңғы үш жылдағы оқушыларды оқытудағы рейтингтік көрсеткіштер;
– білім беру сапасын басқару;
– білім беру сапасын сыртқы және ішкі бағалау нәтижелері;
– халықаралық ынтымақтастықты жүзеге асыру.
Жарыс қаланың білім беру ұйымдарының педагогтері мен басшыларының кәсіби және жеке өсуіне ықпал етуге арналған.
Байқаудың аудандық кезеңі 10-28 сәуір аралығында өтті.
Байқауға барлық мемлекеттік орта білім беру ұйымы қатысады.
Әр ауданнан ұсынылған сегіз білім беру ұйымы арнайы құрмет дипломымен марапатталады, ал жеңімпаз Алматы қаласы әкімінің 56 млн теңге сомасындағы грантын иеленгені туралы сертификат алады.
Грантты тапсыру 2023 жылдың тамыз айында қалалық пленарлық конференцияда жоспарланып отыр.
«Орта білім берудің үздік ұйымы» ретінде грант алған мемлекеттік орта білім беру мекемесіне материалдық-техникалық жабдықтандыруды жақсартуға және білім беру үдерісін ғылыми-әдістемелік қамтамасыз етуге қаражат аударылады.
