«Арселор Миттал Теміртау» азот диоксидін атмосфераға шекті мөлшерден 2,5 есе көп шығарған
Фото: kursiv.media
«АрселорМиттал Теміртау» кәсіпорындары атмосфераға азот диоксидін шекті мөлшерден бірнеше есе көп шығарған. Бұл туралы Қарағанды облысы бойынша экология департаментінің баспасөз қызметі хабарлады.
«2023 жылғы 7 маусымда сағат 8.20-да Қарағанды облысы бойынша экология департаменті атмосфералық ауадағы ластаушы заттардың құрамын анықтау үшін АМТ санитарлық-қорғау аймағынан (Қарағанды тас жолының ауданы) қашықтықтағы атмосфералық ауаға зертханалық өлшеу жүргізді. Зертханалық өлше нәтижесі бойынша азот диоксиді шекті рұқсат етілген концентрациядан 2,5 есе асып кетті», – делінген сәрсенбі күні таратқан хабарламада.
Жоғарыда атап өтілгендей, басқа ластаушы артық заттар табылмаған.
Экологтар Теміртау ауасын жақсарту мақсатында 2019 жылдың 31 қазанында Экология, геология және табиғи ресурстар министрлігі АМТ-мен нақты шығарындыларды 30%-ға азайту туралы меморандумға қол қойғанын еске салды.
«Бұл меморандум зиянды заттардың атмосфераға шығарылуын 65 000 тоннаға азайтуды көздейді. Меморандумда көрсетілген табиғатты қорғау шаралары 2020-2024 жылдарға арналған Қарағанды облысының экологиялық проблемаларын кешенді шешудің жол картасында да көрініс тапты. Меморандум сондай-ақ 2021-2024 жылдар аралығында Теміртау қаласының айналасына 500 мың түп ағаш отырғызуды қамтиды», – деп көрсетілген хабарламада.
