Елімізде суды пайдалану деңгейі төмендемесе, 2029 жылға қарай су тапшылығы болуы мүмкін. Бұл туралы ҚазАқпарат хабарлады.
«Суармалы егіншіліктің негізгі үлесін құрайтын елдің оңтүстік облыстарында су үнемдеу технологияларын енгізу деңгейі төмен. Олар жалпы суармалы жерлер көлемінің 3%-да ғана қолданылады. Экономика салаларында және халық арасында су ресурстарын пайдаланудың ағымдағы жағдайы сақталған жағдайда 2029 жылға қарай су тапшылығына байланысты әлеуметтік-экономикалық даму қарқынының төмендеу қаупі бар», – делінген Ашық НҚА порталында жарияланған Су ресурстарын басқару жүйесін дамытудың 2023-2029 жылдарға арналған тұжырымдамасында.
Бұл ретте Экология министрлігі жерасты суларын пайдалану төңірегіндегі мәселелерді көтерген. Мәлім болғандай, тапшылыққа мына факторлар себеп болып отыр:
– жер астындағы су қорларын игеру дәрежесі төмен;
– жерасты суларының 90%-ы тиісті норма мөлшерінде пайдаланылмайды;
– жерасты суларын қолдану режимінің бұзылуы, сондай-ақ рұқсат етілмеген бұлақтардан су алу. Салдарынан қазір бар қорлар тез сарқылып жатыр.
