Балқаш ЖЭО-сында апат салдарынан генерация толық төмендеді
Фото: kursiv.media
«Kazakhmys Energy» ЖШС-не қарасты Балқаш ЖЭО-сында генерация толық төмендеген. Бұл жайлы Энергетика министрлігінің баспасөз қызметі хабарлады.
«Бейсенбі, 15 маусымда сағат 16:22-де секциялық ажыратқыш зақымданды, соның салдарынан 10 кВ тарату құрылғысы өз электр қажеттіліктерін жоғалтып токтан ажыратылды», делінген хабарламада.
3 қазандық пен 3 турбина сөндірілген. ЖЭО генерациясы 110-нан 0 МВт-қа дейін қысқарды. Сағат 17.10-да электр станциясының энергияны қайта айналдыру жұмыстары басталған. Қазіргі таңда 1 қазандық пен 1 турбина жұмыс істеп тұр.
«Технологиялық бұзушылықты тексеру Ядролық-энергетикалық қадағалау және бақылау комитетінің Қарағанды облысы бойынша аумақтық департаментінің қатысуымен жүргізіледі», деп хабарлады баспасөз орталығы.
Әкімдіктің мәліметінше, қалада электр қуатына қатысты қиындықтар жоқ. Ыстық су қалыпты жұмыс істеп тұр.
Мұның алдында Энергетика министрлігінің баспасөз орталығы Екібастұз ЖЭО-сында жұмыс істеп тұрған №5 қазандыққа төбенің темірбетон плитасы құлағанын хабарлады.
