Биыл террористік сипаттағы қылмыс жасады деген күдікпен 30 адам ұсталды – ҰҚК

Ұлттық қауіпсіздік комитеті халықаралық терроризм мен діни экстремизмге қарсы күрес барысында терроризмге насихаттаған бірнеше азаматты анықтаған. Олар сот шешімімен бас бостандығынан айырылды. Бұл жайлы комитеттің баспасөз орталығы хабарлады.

«Атырау облысының тұрғыны «Т»-ға қатысты терроризмді насихаттау фактісі бойынша 5 жылға бас бостандығынан айыру туралы Атырау қаласының №2 сотының үкімі заңды күшіне енді. Тергеу барысында оның белсенді түрде дін ұстанушылар арасында радикалды идеологияны таратқаны және еліміздің азаматтарына қатысты зорлық іс-әрекеттер жасауға үгіттегені дәлелденді», делінген хабарламада.

Сонымен қатар, Шымкент қаласының әл-Фараби аудандық соты осыған ұқсас фактілер бойынша халықаралық террористік ұйымдары уағызшыларының ықпалына түскен Шымкент қаласының 2 тұрғынын 7 жылға бас бостандығынан айыруға үкім шығарған.

«Тергеу барысында олардың әлеуметтік желілер арқылы терроризм идеологиясын насихаттағандары, сонымен қатар террористік тұрғыдан белсенді аймақтарға жету үшін шетелдік содырлармен байланыс орнатпақ болғандары анықталды. Аталған адамдардың кінәсі куәгерлердің көрсетулерімен, заттай айғақтармен және өзге де материалдармен толық дәлелденді», деп хабарлайды баспасөз орталығы.

2023 жылдың басынан ҰҚК террорға қарсы бөлімшелері террористік сипаттағы қылмыстарды жасады деген күдікпен еліміздің 31 тұрғынын және шетелдікті ұстады. Осы кезеңде сот органдары аталған фактілер бойынша тағы да 10 адамды әртүрлі мерзімдерге бас бостандығынан айырды.