Президенттің сынынан кейін отставкаға өтініш жазған Төтенше жағдайлар вице-министрі қызметінен босатылды
![](https://kz.kursiv.media/wp-content/uploads/2023/07/14-7-1024x576.jpg)
Фото: ТЖМ
Президенттің сынынан кейін отставкаға өтініш берген Төтенше жағдайлар вице-министрі Марат Күлдіков қызметінен босатылды. Бұл жайлы Үкіметтің баспасөз қызметі хабарлады.
«ҚР Үкіметінің қаулысымен Марат Мұхаметқалиұлы Күлдіков берген өтінішіне сәйкес ҚР төтенше жағдайлар вице-министрі қызметінен босатылды», делінген хабарламада.
Естеріңізге сала кетсек, бір ай бұрын, Абай облысы «Семей орманы» резерватындағы өрт кезінде құрылған жедел штаб отырысында Президент Төтенше жағдайлар жөніндегі вице-министр Марат Күлдіковтің сөзін бөліп, оның баяндамасы негізгі мәселеден ауытқып кеткенін ескерткен. ТЖМ басшысы дер кезінде келмегенін, облыс әкімі орынбасарларын жіберіп, жұмысқа деген немқұрайлы қарым-қатынас жасалғанын баса айтқан еді Тоқаев.
Ал 11 шілде күні Төтенше жағдайлар вице-министрі Марат Күлдіков өз еркімен қызметінен босату туралы рапорт жазды.