Қытай 2023-2024 жылдары түсті металдар өндірісін 5% – ға ұлғайтуға ниетті

Қытай ағымдағы және келесі жылы түсті металдар өндірісінің тұрақты өсу қарқынын сақтауға ниетті, деп хабарлады өнеркәсіп және ақпараттандыру министрлігі. Ведомство 2023-2024 жылдары он негізгі түсті металдар шығарылымы шамамен 5% – ға өседі деп күтеді. Бұл туралы Синьхуа агенттігі хабарлады.

Қаңтар-шілдеде елдегі өндіріс көлемі 42,32 млн тоннаны құрады, бұл өткен жылдың сәйкес кезеңіндегі көрсеткіштен 7% – ға артық. Оның ішінде өткен айда шығарылым 4,2% – ға өсіп, 6,03 млн тоннаға жетті.

Ағымдағы жылдың жеті айында бастапқы алюминий өндірісі 23,62 млн тоннаны құрады, бұл 2022 жылдың осы кезеңіндегі көлемнен 2,8% – ға жоғары. Атап айтқанда, шілде айында 3,48 млн тонна металл шығарылды, бұл өткен жылғы көрсеткіштен 1,5% – ға артық.

Негізгі түсті металдарға мыс, алюминий, қорғасын, мырыш, никель, қалайы, сурьма, сынап, магний және титан жатады. 2022 жылдың қорытындысы бойынша олардың өндіріс көлемі 4,3% – ға ұлғайып, рекордтық 67,74 млн тоннаға жетті.