![](https://kz.kursiv.media/wp-content/uploads/2022/01/old-image-82461.jpg)
Қазақстанда ауыл шаруашылығы өнімдерін шығару осы жылы 8,6%-ға төмендеді. Бұл туралы Үкімет отырысында Ұлттық экономика министрі Әлібек Қуантыров айтты.
Министрдің сөзінше, бұған дәнді дақылдарды жинау көлемінің азаюы себеп болып отыр. Жыл басынан бері өндіріс көлемі төмендеген салалар қатарында металл кендерін өндіру – 1,1%, тау-кен өнеркәсібінде қызмет көрсету – 2,3%, көмір өндіру – 5,5% бар.
Министр экономикалық өсуді қамтамасыз ету үшін бірнеше ұсыныс айта кетті.
«Біріншіден, экономика салаларында өсудің оң қарқынын сақтау жөніндегі шараларды іске асыру, егінді тасымалдау және сақтаудағы ықтимал проблемаларды шешуде жедел көмек көрсету қажет. Екіншіден, экспорттаушыларды қолдау шараларын іске асыру арқылы отандық өнім экспортын белсенді ілгерілету керек. Үшіншіден, ағымдағы жылға белгіленген инвестициялық жобаларды тиісті мерзімдерде аяқтау, жаңа инвесторлар тарту және оларды сүйемелдеу бойынша жұмысты жандандырған жөн. Төртіншіден, әлеуметтік маңызы бар азық-түлік тауарлары бағасының маусымдық өсуіне жол бермеу және Инфляция деңгейін бақылау және төмендету бойынша шаралар кешенін іске асырудың тиімділігін бақылау керек. Бесіншіден, бизнес өкілдерін кешенді қолдау және олар үшін қолайлы жағдайлар жасауды қамтамасыз ету қажет», – деді министр.
2023 жылдың қаңтар-қазан айларының қорытындысы бойынша Қазақстан экономикасының өсу қарқыны 4,9%-ды құрады.
Министрдің айтуынша, ең жоғары өсім құрылыс, сауда, ақпарат, байланыс және көлік салаларында болған. Экономиканың нақты секторы – 3,8%, ал қызмет көрсету саласы – 5,4% өскен. Негізгі капиталға салынған инвестициялардың өсу қарқыны 12,6% болған.
«Инвестициялар ағыны көлік және қоймалауда – 58%, денсаулық сақтауда – 40%, саудада – 38%, білім беруде – 18%, ауыл шаруашылығында – 8,7%, өнеркәсіпте – 8,3%-ға өсті. Өңірлер арасында ең жоғарғы өсім Маңғыстау, Абай, Түркістан және Павлодар облыстарында байқалды», – деді министр.
Абай, Батыс Қазақстан, Жетісу және Қызылорда облыстарында, сондай-ақ, Алматы қаласында барлық экономикалық көрсеткіш бойынша өсу қарқыны байқалған.
Министр осы жылы тоғыз ай ішінде сыртқы сауда тауар айналымы 2,4%-ға өсіп, 102 млрд доллар болатынын да айтты.
Өсу қарқыны әртүрлі салаларда байқалған:
- Өңдеу өнеркәсібі – 3,2%
- Азық-түлік өндірісі – 2,9%
- Металл бұйымдары – 3,4%
- Құрылыс материалдары – 1,8%
- Сусындар өндірісі – 1,7%
- Пластмасса бұйымдары – 5,5%
- Жеңіл өнеркәсіп – 12%
- Тау-кен өнеркәсібіндегі – 6,1%
- Газ өндіру – 9,7%
- Мұнай өндіру – 9,3%