iPhone Үндістанда шығарыла бастайды / Фото: kursiv.media
Америкалық Apple Inc. және оның жеткізушілері алдағы екі-үш жылда Үндістанда жыл сайын 50 миллионнан астам iPhone шығаруды жоспарлап отыр. Бұл жайлы өз дереккөздеріне сілтеме жасап, The Wall Street Journal басылымы жазды.
Егер бұл жоспар жүзеге асатын болса, дүниежүзілік iPhone өндірісінің төрттен бірі Үндістан үлесіне тиеді. Дегенмен, Қытай ең ірі смартфон өндірушісі болып қала береді.
Apple соңғы жылдары жергілікті қиындықтарға, соның ішінде нашар инфрақұрылымға және Қытайға қарағанда бизнесті жүргізудегі қиындықтарға және шектеулі еңбек ережелеріне қарамастан, Үндістандағы бизнесін кеңейте бастаған. Дегенмен компания бизнеске қолайлы штаттарда да біраз кедергілерге тап болған. Компанияға жергілікті кәсіподақтар қарсылық білдіруде. Олар компанияның 12 сағаттық жұмыс күнін енгізуіне қарсы. Ал Apple өкілдері бұл өзгерісті дағдарыс кезінде енгізуді бизнес үшін пайдалы деп санайды.
Apple және оның Тайваньдағы Foxconn Technology Group басқаратын серіктесі Үндістандағы алғашқы қадамдардың сәтті болғанын, болашақта мұндағы өндірістің кеңейетініне сенім білдірген.
Үндістанның оңтүстігінде орналасқан Карнатака штатында салынып жатқан Foxconn зауытының бірінші кезеңі сәуір айында аяқталады деп күтілуде. Зауыт алдағы екі-үш жылда жылына 20 миллион ұялы телефон шығарады деп күтілуде. Бұл жерден негізінен iPhone телефондары шығарылмақ. The Wall Street Journal басылымының хабарлауынша Foxconn алдағы уақытта дәл осындай қуатпен жұмыс істейтін тағы бір нысан салуы мүмкін.
Counterpoint зерттеу фирмасының бағалауы бойынша өткен жылы iPhone-ның жаһандық жеткізілімі 220 миллионнан асқан.
