Аргентина өз валютасын 50% құнсыздандырды

Аргентина ұлттық валютасы песоны 50%-дан астам құнсыздандырады. Bloomberg хабарлауынша, ел үкіметі бұл шешуші қадамды ел экономикасына көмектесуге бағытталған төтенше шара деп қабылдаған. Осылайша бір мезетте доллар бағамы 365 песодан 800 песоға дейін өзгерген.

Жексенбіде инаугурациясы өткен Аргентина президенті Хавьер Милей сайлау науқаны кезінде экономиканы қалпына келтіру үшін песоны алып тастап, оны доллармен алмастыруға уәде берген. Ол песо жылдар бойы жасанды түрде капиталды қатаң бақылау арқасында сақталып келгенін айтқан. Бірақ осы жылдың өзінде оның АҚШ долларына қатысты құны шамамен 52% төмендеді.

Аргентинаның орталық банкі соңғы жылдары ел Үкіметіне дефолттан құтылуға көмектесу үшін валюта басып шығара бастап, өз кезегінде бұл бағаның тез өсуіне себеп болды. Бұл гиперинфляцияны тежеуге бағытталған алғашқы қадам болғанымен, қазан айында Аргентинаның орталық банкі базалық пайыздық мөлшерлемені 133%-ға дейін көтеруге мәжбүр болған.

Аргентина экономика министрі Луис Капуто жаңа инфрақұрылымдық жобаларды қысқартуды, қолданыстағы еңбек келісімшарттарын бір жылдан артық ұзартпау жоспарларын және энергетика мен көлікке субсидияларды қысқарту туралы сөз қозғады.

«Инфляцияның әсерінен бірнеше ай бойы қиындықтар туындайды», – деді Капуто.

Министр елдің инфрақұрылымдық жобаларға қаражаты жоқ екенін түсіндірді. Халықаралық валюта қоры жаңа бастамаларды қолдайтынын жеткізді.