Үкімет «Нұр-Сұлтан» және «Нұр-Сұлтан Нұрлы жол» вокзалдарының атауын өзгертпек
Қазақстан Үкіметі Ақмола облысындағы «Нұр-Сұлтан» және «Нұр-Сұлтан Нұрлы жол» теміржол станцияларының атауын өзгерткісі келеді. Бүгін Ашық НҚА порталында аталмыш мекемелердің атын өзгертуге байланысты қаулы жарияланды.
Қоғамдық талқылауға шығарылған «Кейбір теміржол стансалары мен разъездерінің және кейбір теміржол стансалары атауларының транскрипциясын өзгерту туралы» құжат 22 қаңтарға дейін порталда қалады.
Жоба бойынша «ҚТЖ-Жүк тасымалы» ЖШС «БП Ақмола бөлімшесі» филиалының «Нұр-Сұлтан» темір жол станциясын Астана темір жол станциясы, «Нұр-Сұлтан Нұрлы жол» теміржол станциясын Нұрлы жол теміржол станциясы деп өзгеруі керек.
Бұдан бөлек, «ҚТЖ – Жүк тасымалы» ЖШС «БП Алматы бөлімшесі» филиалының 13 теміржол разъезін Ақши теміржол разъезі, «Батыс» филиалы Қызылорда бөлімшесінің 26 теміржол станциясын Жетітөбе станциясы, Маңғыстау бөлімшесінің 1 темір жол разъезін Күйкен темір жол разъезі, Маңғыстау бөлімшесінің 10 темір жол разъезін Боздақ темір жол разъезі, 460 темір жол разъезін Сарға темір жол разъезі, Тірек теміржол станциясын Боранқұл теміржол станциясы, Майкөмген теміржол разъезін Толтыр теміржол разъезі деп өзгерту туралы ұсынылған.
Осыған дейін Қазақстанның білім министрі Ғани Бейсембаев «Назарбаев Зияткерлік мектептері» қамқоршылық кеңесінің талқылауына осы білім беру желісінің атауын өзгерту туралы мәселені шығаруға дайын екенін мәлімдеген.
«Қазір атауды өзгерту бойынша – күн тәртібінде мұндай мәселе тұрған жоқ», – деді Бейсембаев брифингте журналистердің» Назарбаев Зияткерлік мектептері » атауын өзгерту және олардың болашақ тағдыры туралы сұрақтарына жауап бере отырып.
2023 жылы қаңтар айында «Тұңғыш Президенті – Елбасы туралы» заң күшін жойды. Мұндай шешімді ҚР Конституциялық соты қабылдады.
2019 жылы бұрынғы президент өз орнын босатып, уақытша президент лауазымына қазіргі президент Қасым-Жомарт Тоқаев келгенде оның бірінші ұсынысы елорда атауын «Нұр-Сұлтан» деп өзгерту болған. Алайда 2022 жылы Қанды Қаңтар оқиғасынан кейін «Астана» атауын қайтару туралы ұсыныс тастап, оны Тоқаев қолдаған.
