Отбасы банк («Бәйтерек» холдингінің еншілес ұйымы) мемлекеттік білім беру жинақтау жүйесінің қатысушысы атанып, бүгін алғашқы «AQYL» білім беру жинақтау салымдары ашылды.
«Алғашқылардың бірі болып Отбасы банкінде бұл салымды өз балаларына Астана қаласының тұрғыны Ақмаржан Шакупова ашты. Оның егіздері Айбол мен Айбек жақында бір жасқа толған. Енді олардың анасы ұлдарының болашақ біліміне белсенді түрде ақша жинауды жоспарлап отыр», – деп хабарлады «Отбасы банк» баспасөз қызметі.
«AQYL» депозитінің мақсаты – азаматтарымыздың өз біліміне немесе балаларының біліміне қаражат жинау. Оның көмегімен қазақстандық немесе шетелдік білім беру мекемелерінде оқу ақысын төлеуге болады.
Білім беру жинақтау салымының шарттары қандай
«AQYL» білім беру жинақтау салымын кемінде 3 жыл немесе 5 жыл мерзімге ашуға болады. Егер депозит кемінде үш жыл мерзімге ашылса, онда депозит бойынша мөлшерлеме жылдық 12% (ЖТСМ 13,1% дейін) тең болады. Егер депозит кемінде 5 жыл мерзімге ашылса, онда депозит бойынша мөлшерлеме 9,5% (ЖТСМ 10,1% дейін) тең болады.
Банктің есептелген сыйақысы ай сайын капиталдандырылады.
Депозит мерзімі аяқталғаннан кейін, ол автоматты түрде жаңартылады.
«Банк жұмысының алғашқы сағаттарынан-ақ депозитті 50-ден астам қазақстандық ашып үлгерді. Бұл жоба – ата-аналарға балаларының оқуына қаражат жинауға көмектесетін ерекше құрал. Шынымен де, бала дүниеге келісімен әр отбасы ұрпағының қандай білім алатынын, ұлын немесе қызын шетелдік жоғары оқу орнында немесе қазақстандық институтта оқытатынын ойлайды. Егер бала грантқа түссе, онда «AQYL» депозитіндегі жинақтарды шешіп алып, оларды кез келген өзге мақсатқа, соның ішінде тұрғын үй сатып алуға жұмсауға болады, – деп атап өтті «Отбасы банк» Басқармасының төрағасы Ләззат Ибрагимова.
Қазақстандық балалардың білімге қаражат жинақтау ісіне өз үлесін қосып, жыл сайын жинаққа сыйлықақы есептеп отырған мемлекеттің мұндағы көмегі өте маңызды. Салымшылардың барлық санаттары үшін ол 5%-ды құрайды. Ал жетім балаларға, ата-анасының қамқорлығынсыз қалған балаларға, мүмкіндігі шектеулі балаларға, көп балалы отбасылардан шыққан және жан басына шаққандағы табысы аз, яғни азық-түлік себетінен төмен отбасыларға ашылған депозиттерге мемлекеттік сыйлықақы 7% мөлшерінде есептеледі.
Жыл сайын депозитке есептелетін сыйлықақының ең жоғары мөлшері 100 АЕК-тен (2024 жылға 369 200 теңге) аспауға тиіс.
Мемлекеттік сыйлықақы жинақтаудың ең аз мерзімі 1 жыл болғанда есептеледі. Яғни мемлекеттік сыйлықақыны есептеу үшін салым бір жылға толуға тиіс.
Депозит ашылған кезде міндетті түрде жасалатын бастапқы жарнаның мөлшері 3 АЕК немесе 11 076 теңгеге (2024 жылы) тең болуы керек.
Болашақта депозиттің ай сайынғы аударымдар мөлшерін сіз өз мүмкіндігіңізге қарай анықтайсыз.
Салымшының бір ғана қолданыстағы білім беру депозиті болуы мүмкін.
Жинақтау салымы мемлекет пен үшінші тұлғалардың өндіріп алуынан қорғалған. Сондай-ақ Қазақстандық депозиттерге кепілдік беру қорында сақтандырылған. Грант алған кезде жинақтаушы депозитті жаба алады. Сондай-ақ мемлекеттік сыйлықақыны қоса алғанда, жинақтаудың барлық сомасын алуға болады.
«AQYL» депозитін Ұлттық қордан алынған жинақтармен толықтыруға болады
Отбасы банкіндегі «AQYL» депозитін Ұлттық қордан алынған жинақтармен толықтыруға болады. Бұл төлемдерді биыл 18 жасқа толған қазақстандықтар қолдана алады. Оны «Ұлттық қор – балаларға» жобасы аясында enpf-otbasy.kz платформасы арқылы жасауға болады.
Қазақстандықтар Ұлттық қордан берілетін төлемдерді екі мақсатқа жұмсай алады. Тұрғын үй жағдайларын жақсарту және оқу ақысын төлеу үшін пайдалана алады. «Оқу ақысын төлеу» мақсаты «AQYL» депозитін толықтыруды көздейді.
«Отбасы банк» тұрғын үй құрылыс жинақ банкi» АҚ — еліміздегі тұрғын үй құрылыс жинақ жүйесін жүзеге асыратын бірден-бір банк. Ұйым Еуропалық құрылыс жинақ кассалары федерациясына (ЕҚЖКФ) және Халықаралық тұрғын үйді қаржыландыру одағына кіреді. 2022 жылы банк Ұлттық ESG клубының негізін қалаушылардың бірі болды. Банкінің жалғыз акционері – «Бәйтерек» Ұлттық басқарушы холдингі» АҚ.
Еске сала кетсек,«Ұлттық қор – балаларға» жобасы аясында төлемдер тағайындалды. Ақпаннан бастап еліміздегі 6,9 млн баланың есепшотына 100,5 доллардан түсті.
