Қазақстандықтар су тасқынынан кейін бірқатар шенеуніктің отставкасын талап ететін петиция жариялады
Қазақстандықтар су тасқынынан кейін, жағдайға кінәлі деп саналатын шенеуніктердің қызметінен кетуін талап етіп петиция жариялады. Екі күн бұрын, яғни 30 наурызда жарияланған петицияға 3 мыңнан астам адам қол қойған.
Alash.online веб-сайтындағы петицияда жақында президент қатысуымен өткен Үкімет отырысында Қасым-Жомарт Тоқаевтың премьер-министрдің бірінші орынбасары Роман Склярға, су ресурстары және ирригация министрі Нұржан Нұржігітовке, Атырау, Ақмола, Алматы, Павлодар облыстары мен Абай облыстарының әкімдеріне қатаң сөгіс жариялағаны және Ақтөбе, Қостанай және Батыс Қазақстан облыстарының әкімдері қызметіне ескерту жасағаны жазылған.
«Қазақстанда су тасқынына қарсы іс-шаралар бойынша әрекет етпеген шенеуніктерді отставкаға жіберуді талап етеміз. Біз мұқият тергеуді талап етеміз! Бұл туралы жаңалықтар ресурстарына хабарлаңыз. Тек осылай ғана біз қоғамдық наразылықты көтеріп, биліктің назарын мәселеге аудара аламыз», – делінген петицияда.
Петицияда қазірдің өзінде 3 мыңнан астам қолдау дауысын жинаса, оған саны 10-ға жетпейтін адам қарсы болған.
Осыған дейін Мәдениет және ақпарат вице-министрі Данияр Қадыров Қазақстан Президенті қазан айында қол қойған «Петициялар туралы» заң 2024 жылдың сәуір айында ғана күшіне енетінін және әзірге бұл заңмен реттелмегендіктен, петициялар қарастырылмайтынын айтқан еді.
«Әр азаматтың дауысы өте маңызды. Азаматтар «eOtinish» арқылы өтініш беруге құқылы. Сәуірде петицияға арналған платформа жұмыс істей бастайды, қазақстандықтар өздерінің заңды құқықтарын пайдалана алады. Қоғамдағы резонанстық мәселелерге міндетті түрде назар аударылады», – деді вице-министр.
Петиция мәслихат деңгейінде кемінде 2500, үкімет деңгейінде 50 мыңнан аса дауыс жинау керек.
Петицияны тіркеу және есепке алу қағидалары бекітілді
«Осы петицияларды тіркеу және есепке алу қағидалары (бұдан әрі – Қағидалар) Қазақстан Республикасының Әкімшілік рәсімдік-процестік кодексі (бұдан әрі – Кодекс) 90-4-бабының үшінші бөлігіне сәйкес әзірленді және «Электрондық жолданымдар» ақпараттық-талдау жүйесі арқылы субъектілерге келіп түсетін петицияларды тіркеу және есепке алу тәртібін айқындайды», – делінген Ақпарат министрлігінің хабарламасында.
Петицияны тіркеу тәртібі:
- Мемлекеттік органның атына келіп түскен петиция «Электрондық жолданымдар ақпараттық-талдау жүйесінің «Е-петиция» модулінде тіркелуге тиіс.
- Петицияны тіркеу органға келіп түскеннен кейін бір жұмыс күні ішінде жүзеге асырылады.
- Петицияның тіркеу нөмірі бастапқы тіркеу кезінде тұтас тәртіппен тек бір рет беріледі және әріптік индекстен, сондай-ақ бірегей нөмірден тұрады.
- Петиция үшін «П» әріптік индексі беріледі.
- Бірегей нөмірде алғашқы төрт сан тіркелген жылды, келесі сегіз цифр реттік нөмірді білдіреді.
- «Е-петиция» модулінде петицияны тіркегеннен кейін арыз иесіне петицияның бірегей нөмірін қамтитын хабарлама жіберіледі.
