Қазақстан 300 мың тонна көлемінде қант шикізатын импорттауға квота енгізбек
ҚР Ауыл шаруашылығы министрлігі 300 мың тонна көлеміндегі құрғақ қант шикізатын бажсыз әкелу туралы бұйрық дайындады.
«Қант өндірушілерді шикізатпен үздіксіз қамтамасыз ету мақсатында Еуразиялық экономикалық комиссия деңгейінде қамыс қантының үштен бір бөлігінен бажсыз импорты бойынша жеңілдік қарастырылған. Үшінші елдерден Қазақстан Республикасы үшін 300 мың тонна көлемі келісілді», – делінген бұйрық жобасының мәтінінде.
Бұйрық жобасы «Ашық НҚА» порталында талқылау үшін орналастырылған. Талқылау 22 сәуірге дейін жалғасады. Бұйрық жобасына сәйкес, квота 2024 жылдың 31 желтоқсанына дейін созылады.
Өткен жылы қант шикізатын импорттау квотасы 350 мың тоннаны құрады. Биыл Қазақстан қант қызылшасы егістігінің көлемін екі есеге немесе 13,3 мың гектарға ұлғайтып, 26,3 мың гектарға жеткізуді көздеп отыр.
Айта кетейік, бұған дейін Қазақстанда қант бағасының өсімі 2022 жылдың тамыз айындағы деңгейге жеткені туралы хабарлаған едік.
