«Болашақ» халықаралық стипендиясы: үміткерлер су қауіпсіздігі және су бұру мамандықтары бойынша шетелде дайындықтан өте алады
2024 жылы алғаш рет «Болашақ» халықаралық стипендиясына және «500 ғалым» ғылыми тағылымдамасына құжаттар қабылдау үздіксіз жүргізіледі. Үміткерлер 29 сәуірден бастап құжаттар тапсыра алады. Ал оның аяқталу мерзімі 25 қазан деп белгіленген.
Бұл ретте іріктеу 2024 жылғы 10 мамырдан 30 қарашаға дейін өтеді
«Болашақ» стипендиясына құжаттар egov.kz. порталы арқылы қабылданады «500 ғалым» бойынша өтінімдерді қабылдау және конкурстық іріктеу алғаш рет bolashak.gov.kz. порталында «Үміткердің жеке кабинеті» бөлімінде онлайн жүргізіледі.
2024 жылы «Болашақ» бағдарламасы бойынша оқу үшін 555 стипендия бөлінді. Оның ішінде 395 стипендия магистратура және резидентураға. Ал докторантура бағдарламалары бойынша – 50 стипендия, тағылымдамадан өту үшін – 110 стипендия бөлінді.
Басым мамандықтар белгіленді
Шетелде кадрлар даярлау кезінде басымдық инженерлік-техникалық және медициналық мамандықтарға беріледі. Басым мамандықтар тізбесі орталық және жергілікті мемлекеттік органдардың өтінімдері, қысқа мерзімді және ұзақ мерзімді даму стратегиялары мен жоспарлары бойынша қалыптастырылды.
Биылғы ерекшелік, үміткерлер су қауіпсіздігі және су бұру, агроорман шаруашылығы, құрылыс, АӨК, жасанды интеллект, молекулалық генетика және т. б. сияқты өзекті мамандықтар бойынша шетелде дайындықтан өте алады.
«Болашақ» стипендиясы бойынша квоталық санаттар қарастырылған
Олар инженерлік-техникалық қызметкерлер, медициналық мамандар және ауылдық жерлерден кандидаттар. Квоталық санаттағы үміткерлер тегін тілдік дайындықтан өте алады. Сондай-ақ құжаттарды тапсыру кезінде шетелдік жоғары оқу орнына өз бетінше түсудің қажеті жоқ. Олар стипендия тағайындалғаннан кейін оқу орнын таңдай алады.
«500 ғалым» бағдарламасы әлемнің жетекші ғылыми орталықтарында қазақстандық ғалымдардың біліктілігін арттыру мақсатында Мемлекет басшысының тапсырмасына сәйкес бекітілді. Ғылыми тағылымдамалар бағдарламасы бойынша жыл сайын 500 стипендия бөлінеді.
Мемлекет академиялық оқуға, тағылымдамадан өтуге, ұшуға, медициналық сақтандыруға, визалық алымдарға, оқу материалдарын сатып алуға жұмсалатын шығындарды өтейді. Соннымен қатар ай сайын стипендия төленеді.
Еске сала кетсек, 13 наурыз «Болашақ» тағылымдамасынан өтетін қызметкерлер санатының жаңа тізімі бекітілді. Бұл туралы Мемлекеттік кеңесші Ерлан Қариннің төрағалығымен Шетелде кадрлар даярлау жөніндегі республикалық комиссияның отырысында айтылды.
