Қазақстан кәсіпкерлерінің құқықтарын қорғау жөніндегі жаңа уәкіл тағайындалды
Экс-депутат Қанат Нұров Қазақстан кәсіпкерлерінің құқықтарын қорғау жөніндегі уәкіл лауазымына тағайындалды. Бұл туралы Ақорда хабарлады.
«Мемлекет басшысының өкімімен Қанат Ілияұлы Нұров кәсіпкерлердің құқықтарын қорғау жөніндегі уәкіл лауазымына тағайындалды», – делінген хабарда.
Бұрын бұл қызметте болған Рустам Манарбекұлы Жүрсінов президент өкімімен лауазымынан босатылған.
Қанат Нұров 1967 жылы Алматыда дүниеге келген. 1992 жылы Әл-Фараби атындағы ҚазМУ-ды (қазіргі ҚазҰУ) «Тарих» мамандығы бойынша бітірген.
«Юрист» порталының ақпаратына сүйенсек, 2000 жылдан 2006 жылға дейін – «Қазақтелеком» АҚ вице-президенті, бас қаржы директоры. 2006 жылдан 2007 жылға дейін – «Казкоммерцбанк» АҚ басқарушы директоры. 2021 жылға дейін – «Plankion Group» және «Аспандау» ғылыми-білім беру қорының президенті.
2021 жылдан 2023 жылға дейін – жетінші шақырылымдағы мәжіліс депутаты.
Кәсіпкерлердің құқықтарын қорғау жөніндегі кеңес «Атамекен» кәсіпкерлер палатасы жанынан кәсіпкерлік субъектілерінің құқықтары мен заңды мүдделерін қорғау бөлігінде жұмыстың тиімділігін арттыру мақсатында құрылған. Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңес 15 адамнан тұрады. Оның ішінде облыстық прокуратураның, Мемлекеттік қызмет істері департаментінің, сыбайлас жемқорлыққа қарсы қызметтің, Табиғи монополияларды реттеу департаментінің өкілдері, заңгерлер, кәсіпкерлер, қоғам қайраткерлері болады.
