Прокурор Айжан Аймағанова Бишімбаевтың соттағы басты қателігін атады
Сот процесі кезінде экс-министр Қуандық Бишімбаевтың қателігі прокурорларға өз телефонының паролін беруі болған. Бұл туралы сот процесіндегі прокурор Айжан Аймағанова Tengri TV-ге берген сұхбатында айтты.
«Бишімбаевтың басты қателігі – бізге телефонының паролін берді. Ол әр минут сайын түсірген 27 бейнежазба туралы белгілі болды. Оның мас болғаны соншалық, сол кеште түсірілген бұл бейнелер туралы ұмытып кеткен», – деді Аймағанова сұхбатында.
Прокурордың сөзінше, Бишімбаев мұндай жазбаларды тұрақты негізде жасаған болуы мүмкін.
«Адам бір нәрсені үнемі жасап жүрсе, яғни әдет болса, ол өз әрекеттерін бақылауда ұстай алмай қалады», – деп түсіндірді ол.
22 сәуірдегі сот отырысында Бишімбаев судьяға ұялы телефонының құпиясөзін берді. Судья Айжан Құлбаева сотталушы Қуандық Бишімбаевтың телефонына қайғылы оқиға болған күні түсірілген видеоларды көріп шықты. Ол жерде Қуандық Бишімбаевтың марқұм Нүкеноваға жеке сипаттағы сұрақтар қойғаны түсірілген. Оның ішінде басқа ер адамдармен жақын қарым-қатынасы туралы сұраған сәті бар.
«Видеоның барлығында жәбірленуші Нүкенова қара күртеше киіп алған. Оның ішінде басқа киім жоқ. (…) Көлікте түсірілген видео бар, ол жерде де жәбірленуші бір күртешемен отыр», – деді видеоны көріп отырып судья Құлбаева.
Судья Айжан Құлбаева жәбірленуші Айтбек Амангелдіге бұл видеоларды көрмеуге кеңес берді. Алайда марқұмның ағасы бұған дейін де қылмыстық іс материалдарымен танысқанын, сол күні не болғанын білу өзіне аса маңызды екенін айтты.
Астанада бұрынғы ұлттық экономика министрі Қуандық Бишімбаевтың ісі бойынша сот процесі 11 наурызда басталды. Бишімбаевқа қылмыстық кодекстің 99-бабы 2-бөлігі 5-тармағы және 110-бабы 2-бөлігінің 1-тармағында көрсетілген қылмыстық әрекетті жасады деген айып тағылған.
18 сәуірдегі сот отырысында сотталушы Бақытжан Байжановтың ұялы телефонындағы деректер тексерілді. Содан кейін Бишімбаевтың телефонын зерттеу жоспарланған. Алайда Бишімбаев телефонының құпиясөзін тек өз қорғаушысына айтатынын жеткізді.
13 мамырда сот Үкімімен Бишімбаев түпкілікті 24 жылға бас бостандығынан айырылды. Бишімбаев жасаған қылмыс қауіпті қылмыстың қайталануы деп танылды. Бишімбаевтың туысы, Байжанов Бақытжан Әмірханұлы аса қауіпті қылмысты жасырғаны үшін Қылмыстық кодекстің 432-бабында қарастырылған айыпқа сәйкес, кінәлі деп танылып, 4 жылға бас бостандығын айыру туралы сот үкімі шықты.
