Органикалық өнім өндірісін дамытуға байланысты жаңа заң қолданысқа енеді
Тоқаев «Органикалық өнім өндірісі және айналымы туралы» Қазақстан Республикасының заңына қол қойды. Ақорда ақпараты бойынша бұл заң табиғи ресурстарды сақтауға және оларды ұтымды пайдалануға, сондай-ақ дұрыс тамақтану дағдысын қалыптастырып, органикалық өнім нарығын дамытуға бағытталған.
Соған сәйкес бірқатар жаңа ереже енгізілген:
- Біріншіден, заңда органикалық өнім өндірісі мен айналымы саласындағы ұлттық заңнаманың мақсаттары мен міндеттері қайта қаралған.
- Екіншіден, органикалық өнім өндірушілердің аясы кеңейтілген. Яғни олардың қатарына жеке және заңды тұлғалардан бөлек, органикалық өнім өндірумен айналысатын бірлестіктерді (жай серіктестіктерді) жатқызуға болады.
- Үшіншіден, заңда органикалық өнім өндіруге көшу шарттары қарастырылған және оның өндірісіне, таңбалануына және айналымына қатысты талаптар бекітілген.
- Төртіншіден, органикалық өнім өндірісі саласындағы халықаралық тәжірибелер мен стандарттарға сәйкестендіру мақсатында өндірілген өнімнің сапасы үшін ерікті қатысу, ішкі бақылау, сондай-ақ ұжымдық жауапкершілік қағидаттарына негізделген бірлескен кепілдіктер жүйесін (PGS) құру және оның жұмысы жөніндегі ережелер қамтылған.
Заң мәтіні баспасөзде жарияланады.
2023 жылы Қазақстан органикалық өнімнің экспорты бойынша 123 елдің ішінде 9-орынға тұрақтады. Органикалық өнімдердің әлемдік нарығы 12 млрд еуро шамасында. Соңғы 20 жылда оның көлемі 7 есе өсті.
Органикалық өнім өндірісін дамыту – азық-түлік қауіпсіздігін қорғауға кепіл болатын шаралар жүйесі. Мәжілістің екінші оқылымында өндірушілерге екі бағыт бойынша мемлекеттік қолдау қарастырылатыны айтылды. Сәйкестік сертификаты құнының 50%-ын және органикалық тыңайтқыштарды субсидиялау тетіктері қарастырылған.
