Денсаулық сақтау министрлігі сирек кездесетін ауруға шалдыққандарға дәрі-дәрмек сатып алуды жалғастыра ма?
Денсаулық сақтау министрлігі сирек ауруларға шалдыққан қазақстандықтар үшін дәрі-дәрмек сатып алуды жалғастырады. Мұны ведомство басшысы Ақмарал Әлназарова елордада өткен брифингте мәлімдеді.
Министрдің айтуынша, сирек кездесетін ауруларға шалдыққан науқастарды емдеу үш көзден қаржыландырылады: Денсаулық сақтау министрлігі, «Қазақстан халқы» қоры және жергілікті атқарушы органдар.
«Пациенттерде алаңдауға негіз жоқ. Қаржыландырудың үш көзі де қалады. Жалғыз нәрсе, біз қазір пациенттерді сатып алу және қамтамасыз ету үшін тізімді дұрыс таратудың жолдарын қарастырамыз. Осы топтағы науқастарға арналған бюджетті оңтайландыру мәселесі бүгінде көтерілген жоқ», – деп сендірді министр брифингте.
Бұған дейін қоғам белсенділері мен сирек кездесетін дертке шалдыққан балалардың ата-аналары Денсаулық сақтау министрлігі кейбір дәрілерге арналған қаржыны қайырымдылық қорларына аударуды жоспарлап отырғанын айтып, дабыл қаға бастаған болатын. Осылайша, дәрі-дәрмекті бюджет ақшасына емес, демеушілік арқылы сатып алуға болады. Қоғамдық белсенділер дәрі-дәрмектің өте қымбат екенін, мұндай шығынды барлығы көтере алмайтынын, науқастар дер кезінде ем ала алмай қалу қаупі барын атап өтті.
Қазақстанда барлығы 76 мың сирек кездесетін аурумен ауыратын науқас бар. Мұндай науқастарға мемлекет 202 дәрі-дәрмек сатып алады. «СК-Фармация» мәліметінше, 2019 жылы мемлекет сирек кездесетін ауруларды емдеуге арналған дәрі-дәрмектерге 30,3 млрд теңге, 2023 жылы 90,3 млрд теңге жұмсаған. 2024 жылы Қазақстан 72,3 млрд теңге жұмсауды жоспарлап отыр.
