Мәдениет және ақпарат министрлігі фильмдерге прокат куәлігін беру ережелеріне өзгерістер енгізгісі келеді. «Саяси нанымдарға нұқсан келтіретін» картиналарды кинопрокатқа шығармауды ұсынады. Мәдениет министрлігінің бастамасымен кинотеатрларға шықпас бұрын фильмдерді көретін комиссия пайда болуы мүмкін. Комиссия құрамына президент әкімшілігінің өкілдері кіреді.
«Фильмге прокаттау куәлігін беру қағидалары» туралы бұйрыққа өзгерістер жобасы «Ашық НҚА» сайтында жарияланды. Жоба 26 маусымға дейін қоғамдық талқылауда болады.
Министрлік фильмдерге прокат куәлігін беруден бас тартудың жаңа факторларын жазған.
«Егер фильмнің мазмұны Республиканың Конституциялық құрылысын күштеп өзгертуді, тұтастығын бұзуды, мемлекеттің қауіпсіздігіне, саяси нанымдарға нұқсан келтіруді, әлеуметтік, нәсілдік, ұлттық, діни, тектік-топтық және рулық араздықты қоздыруды, қатыгездік пен зорлық-зомбылыққа табынуды, сондай-ақ порнографияны насихаттауға немесе үгіттеуге бағытталған жағдайда прокаттау куәлігі берілмейді», – деп жазылған түзетуде.
Сонымен қатар Мәдениет және ақпарат министрлігі кинотеатрларда жалға алудан бұрын фильмдерді бағалайтын комиссия құрғысы келеді.
«Кинематография саласындағы уәкілетті органның жазбаша сұрау салуы бойынша көрсетілетін қызметті алушы фильмдерді прокаттау куәлігін алар алдында олардың қарауын ұйымдастырады. Кинотеатрға шығатын фильмдерді көру кинематография саласындағы уәкілетті органның жанынан құрылған, уәкілетті органның, Қазақстан Республикасы Президент Әкімшілігінің өкілдерінен тұратын комиссиямен жүзеге асырылады», – делінген құжатта.
Бұған дейін Мәдениет және ақпарат министрі Аида Балаева «Қазақфильм» киностудиясының төңірегіндегі мәселеге қатысты пікір білдірген.
«Құрметті достар! «Қазақфильм» айналасында болып жатқан мәселелер жайында айта кеткім келеді. Шынында да, қазір біз айналысып жатқан жүйелі мәселелер бар. Осыған байланысты ұйымдастыру және заңнамалық шаралар қабылданатын болады. Аты аңызға айналған «Қазақфильмнің» бұрынғы даңқы көп ұзамай оралатынына сенімдімін. Алдағы уақытта сапалы фильмдер түсіріп, көрерменді қуанта береді деп ойлаймыз»- деп жазды министр өзінің әлеуметтік парақшасында.
