Қазақстанда онлайн несие алуға өтініштерді қарау мерзімі ұзартылуы мүмкін. Бұл туралы депутаттардың сауалына жауап берген ҚР Бас прокуроры Берік Асылов мәлім етті.
Оның айтуынша, 2024 жылдың мамыр айында Алаяқтықтың алдын алу бойынша координациялық кеңестің отырысы өтіп, онда қабылданған шаралардың тиімділігі талқыланған.
«2023 жылы алаяқтық 77%-ға қысқарған Беларусьтің оң тәжірибесін ескере отырып, Координациялық кеңес онлайн несие алуға өтінімдерді қарау мерзімін ұзарту туралы ұсынысты қолдады. Мұндай жаңашылдық алаяқтықтың әлеуетті құрбандарына дер кезінде мұны анықтауға мүмкіндік береді», – деп жазылған Асыловтың жауабында.
Бас прокурор 2024 жылы интернет-алаяқтық фактілері бойынша 8 мыңнан астам қылмыстық іс тіркелгенін, оның жартысы несиелерді өңдеуге қатысты екенін атап өтті.
«Осындай жағдайлардың барлығында дерлік аңқау азаматтар кибералаяқтардың ықпалымен онлайн несиені өздері рәсімдеген. Сонымен қатар қашықтан несие алуға арналған түрлі бағдарламаларды жүктеп алу арқылы олардың айласына алданған», – деп түсіндірді Асылов.
Ол мұндай істер бойынша сотқа дейінгі тергеп-тексеру мерзімі негізінен күдіктіні анықтау мүмкіндігі төмен болғандықтан ұзаққа созылатынын айтты. Сондықтан Кеңес қатысушылары интернет-алаяқтық үшін жауапкершілікті күшейтуді ұсынды. Сондай-ақ киберқылмыс белгілері анықталса, клиенттердің өтініші бойынша несие рәсімдеуді бұғаттау ұсынылады.
Бұған дейін Қазақстанда онлайн микронесие алу үшін биометриялық сәйкестендіруден өту міндеттелді. Кейін қаржы ұйымдарында биометриялық сәйкестендіру өткізу қағидалары бекітілді. Бұл жайлы Қаржы нарығын реттеу және дамыту агенттігінің «Ашық НҚА» порталында жарияланған құжатта жазылған.
